Қашқадарё вилоятининг Ғузор туманида яшовчи 43 ёшли фуқаронинг 38 ёшли укасини тириклайин ёқиб юбориши ортидан ҳудудда фаолият юритувчи ошхоналар фаолиятига чеклов ўрнатилиши мумкин. Бу ҳақда мазкур жиноят муҳокамасига бағишланган тадбирда сўз юритилди.
Вилоят ИИБ ахборот хизматининг бу ҳақда ёзишича, бошқарма бошлиғи Шуҳрат Сотволдиев 2021 йилнинг 10 ноябрь куни Ғузор туманида бўлиб, мазкур қотиллик юзасидан муҳокама йиғилиши ўтказган.
«Ғузор тумани ‘Совлиғар’ МФЙда Пачкамар қишлоғида ёқилган ҳолда топилган мурданинг ўлими юзасидан муҳокама йиғилиши бўлиб ўтди. Унда Қашқадарё вилояти ИИБ бошлиғи ҳамда туман ИИБ масъул ходимлари ва барча сектор раҳбарлари, маҳалла фаоллари ва қотиллик жинояти содир этган шахснинг оила аъзолари иштирок этди. Йиғилишда сўзга чиққан вилоят ИИБ бошлиғи, полковник Шуҳрат Сотволдиев содир этилган жиноятни юзага келтирган сабаб ва омилларни атрофлича таҳлил этди», — дейилади вилоят ИИБ ахборот хизматининг бу ҳақдаги хабарида.
Қайд этилишича, йиғилишда жиноятнинг келиб чиқиш сабаблари ва бунга шарт-шароит яратган омиллар мутасадди идоралар ва маҳалла фаолларининг хатти-ҳаракати муҳокама қилинган.
«Спиртли ичимликлар сотилишини назорат қилувчи идоралар ҳудуддаги умумий овқатланиш жойларини вақтида текширганида эҳтимол бу фуқаро спиртли ичимликка муккасидан кетмаган ва бир инсоннинг умри бевақт завол топмаган бўлиши таъкидланди. Мутасаддиларга ҳудуддаги ошхоналар белгиланган вақтларда мижозларга хизмат кўрсатиши, тунги вақтларда фаолият кўрсатмаслиги юзасидан зарур чора-тадбирларни кўриши тавсия этилди», — дейилади муҳокама йиғилиши ҳақида хабар берган масъул идора ахборот хизмати хабарида.
«Дарё» мухбирининг аниқлаштиришича, қотиллик содир этилган ҳудуд — М39 халқаро автомобиль йўлидаги Пачкамар қишлоғида фаолият юритувчи ошхоналар тун-у кун ишлайди. Қолаверса, қотиллик содир этилган ҳудуд ва марҳум яшовчи қишлоқ — Совлиғор ўртасидаги масофа 20—25 километрни ташкил қилади.
Бош прокуратура ахборот хизмати берган маълумотда ака укасини Совлиғор қишлоғидаги чойхоналардан олиб чиқиб, уйига олиб борган ва роса калтаклаб, оёқ-қўлларини сим билан боғлаб, уйдан олиб чиқаётганда соат 22:00 атрофида бўлган. Қотиллик эса ундан кейин содир бўлган. Шу боисданми вилоят ИИБ бошлиғи бошчилигидаги муҳокамада қотиллик содир этилган ҳудудда ошхоналарнинг тунги вақтда хизмат кўрсатмаслиги тавсия қилинган. Мазкур тадбир хулосасига кўра, эндиликда Пачкамар ҳудудидаги йўловчиларга 24 соат хизмат кўрсатувчи ошхоналар фаолиятига ҳам чеклов ўрнатилиши мумкин.
Эслатиб ўтамиз, аввалроқ Ғузорда ака ўз укаси Э.А. маст ҳолда доимий равишда онаси С.Д.ни уятли сўзлар билан ҳақоратлаб, жанжал қилиб келгани ва бу ҳолат 31 октябрь куни ҳам такрорлангани учун роса калтаклаб, оёқ-қўлларини сим билан боғлаган ҳолда тириклайин ёқиб юборгани ҳақида хабар берилганди.
Қотилликда гумонланган акага Жиноят кодексининг 97-моддаси (қасддан одам ўлдириш) билан жиноят иши қўзғатилган.
Мавзуга доир:
Изоҳ (0)