«Форсаж» юлдузи Вин Дизель фильмнинг собиқ актёри Дуэйн Жонсонни франшизанинг якуний қисмида рол ўйнашга таклиф қилди. У ўз мурожаатини Instagram’да эълон қилди, деб ёзади Esquire.
Маълум бўлишича, 2016 йилда «Форсаж» фильмининг саккизинчи қисмини суратга олиш чоғида актёрлар қаттиқ уришиб қолган, бунинг сабабини кейинчалик улар ижодий келишмовчилик деб аташган. Ўшандан бери ҳар иккала актёр ҳам оммавий ахборот воситалари орқали бир-бирига қарши бўлган. «Форсаж» фильмининг 5–8-қисмларида ва «Хоббс ва Шоу» спин-оффида махсус агент Хоббс ролини ўйнаган Жонсон франшизанинг тўққизинчи қисмида Дизель билан бир кадрда пайдо бўлмади.
Instagram’да Дизель собиқ ҳамкасбини ўзининг укаси деб атади ва фарзандлари учун у доим Дуэйн амаки бўлиб қолишини маълум қилди. Дизельнинг сўзларига кўра, у кўп йиллар олдин марҳум дўсти – «Форсаж» юлдузи Пол Уокерга франшизанинг финал қисмини энг ажойиб тарзда суратга олиш учун берган ваъдасини бажармоқчи.
«Сен унда иштирок этишинг керак. Франшизани тарк этма, бу рол сен учун жуда муҳим. Ҳеч ким сен каби Хоббсни ўйнай олмайди. Умид қиламанки, муваффақиятсизликка учрамайсан ва мақсадингни амалга оширасан», — деб ёзади Дизель.
Унинг постига аллақачон 1,2 миллиондан ортиқ лайк босилган, бироқ Жонсон ҳалигача бу таклифга изоҳ бермаган. Лекин 2021 йил июль ойида Хоббснинг ижрочиси «Форсаж»га қайтмаслигини айтиб ўтган эди.
«Форсаж» 10 фильмининг премьераси 2023 йил апрель ойида бўлиб ўтади. Бу франшизанинг охирги қисми ҳисобланади.
Изоҳ (0)