Айрим сайлов участкаларида «оилавий» овоз бериш (оиланинг бир аъзоси бошқа қариндошлари учун ҳам овоз бериши ҳолати, бу қонун билан тақиқланган) ҳолатлари кузатилмоқда. Бу ҳақда 24 октябрь куни Тошкентда бўлиб ўтган брифинг чоғида Марказий сайлов комиссияси раиси ўринбосари Баҳром Қўчқоров маълум қилди, дея хабар бермоқда «Gazeta.uz».
Аввалроқ ижтимоий тармоқларда Тошкентдаги 519-сайлов участкасида олинган видеоёзув тарқалган эди. Унда сайловга ўғли билан келган эркак қўлида икки паспортни тутганича овоз бериш учун рўйхатдан ўтаётгани, айни вақтда участка сайлов комиссияси аъзолари уни огоҳлантирмаётгани акс этган. Шундан сўнг эркак ва бола бюллетенни тўлдириб, овоз бериш урнасига борган.
«Марказий сайлов комиссияси округ сайлов комиссиялари билан ҳамкорликда бутун сайлов жараёнини мониторинг қилиб, ижтимоий тармоқларда эълон қилинаётган хабарлар, фотосуратлар ва видеороликларни ўрганиб бормоқда. 519-сайлов участкасида олинган видеоёзув ҳам таҳлил қилинди. Ўрганиш натижаларига кўра тўпланган маълумотлар прокуратура органларига топширилди», — деди Баҳром Қўчқоров.
«Таъкидлаш жоизки, кўрилган кенг тарғибот ва ташвиқот ишларига қарамай, ушбу салбий амалиётдан ҳали-ҳануз тўлақонли воз кеча олмаганимиз кўринмоқда. Шунинг учун барча фуқаролардан ‘Бир сайловчи – бир овоз’ тамойилига қатъий риоя қилишларини яна бир бор сўраб қоламиз», — дея таъкидлади МСК раиси ўринбосари.
У Марказий сайлов комиссияси Ўзбекистон сайлов амалиётида «оилавий» овоз бериш иллати тўлиқ барҳам топиши учун бундан кейин ҳам тизимли чоралар кўришига ваъда берди. «Сайлов натижаларини сохталаштиришга қарши курашнинг энг самарали йўли — бу жамоатчилик назоратидир», — дея қайд этиб ўтди Қўчқоров.
Аввалроқ Ўзбекистон бош прокурори Тошкент вақти билан 15:00 ҳолатига сайловда қонунбузарлик ҳолатлари юз бергани бўйича маълумот келиб тушмаганини маълум қилган эди. Шунингдек, Олий суд раиси Козимжон Комилов ҳам соат 17:00 да бўлиб ўтган брифинг чоғида судларга сайловдаги қоидабузарликлар юзасидан шикоятлар келиб тушмаганини билдирган эди.
Бир киши оиласининг бошқа аъзоси учун ҳам овоз бериши ҳолати ҳақида Европада хавфсизлик ва ҳамкорлик ташкилотининг махсус мувофиқлаштирувчиси Рейнхолд Лопатка ҳам маълумот берган эди. «Gazeta.uz»нинг ёзишича, унинг мухбирлари сайлов участкаларидан бирида шунга ўхшаш уринишга гувоҳ бўлган.
Изоҳ (0)