Ўзбекистонда 24 октябрь куни бўлиб ўтадиган Президент сайловида илк бор унча оғир бўлмаган ёки ижтимоий хавфи катта бўлмаган жиноятларни содир этгани учун жазо муддатини ўтаётган маҳкумлар ҳам қатнашади. Бу ҳақда ИИВ ахборот хизмати бошлиғи Шоҳрух Ғиёсовга таяниб, UzNews хабар берди.
Фото: «Дарё» / Мадина Нурман
Таъкидланишича, бугунги кунда қамоқда сақлаш ва озодликдан маҳрум этиш жойларида сайловда овоз бериш ҳуқуқига эга бўлган 8203 нафар сайловчи овоз бериш ҳуқуқидан фойдаланиш имкониятига эга.
Сайлов қонунчилигига кўра, сайловга 60 кун қолганда қамоқда сақлаш ва озодликдан маҳрум этиш жойларидаги сайловчиларнинг овоз бериши учун жами 18 та сайлов участкалари ташкил этилган.
Мазкур сайлов жараёнларида номзодлар, кузатувчилар, оммавий ахборот воситалари вакиллари иштирок этиш ҳуқуқига эга ва улар тўсиқсиз ичкарига қўйилади. «Жазони ижро этиш муассасалари ва тергов ҳибсхоналаридаги сайловчиларнинг овоз бериш ҳуқуқи тўлиқ таъминланади», — дейилади хабарда.
Сайлов кодексининг 5-моддасига кўра, суд томонидан муомалага лаёқатсиз деб топилган фуқаролар, шунингдек, суд ҳукми билан озодликдан маҳрум этиш жойларида сақланаётган шахслар сайланиши мумкин эмас. Суд томонидан муомалага лаёқатсиз деб топилган фуқаролар, шунингдек, оғир ва ўта оғир жиноятлар содир этгани учун суднинг ҳукми билан озодликдан маҳрум этиш жойларида сақланаётган шахслар сайловда иштирок этмайди.
Маълумот учун, Ўзбекистонда бугунги кунда 22 мингдан ортиқ киши жазони ижро этиш муассасаларида жазо муддатини ўтамоқда. Улардан 7 мингдан ортиғи манзил колонияларда, 14 мингдан ортиғи ёпиқ турдаги колонияларда жазо муддатини ўтаётгани айтилган эди.
