Жиззах вилоятида 8—16 октябрь кунлари содир бўлган йўл-транспорт ҳодисалари оқибатида жами олти киши ҳалок бўлди. Бу ҳақда ИИВнинг «Йўл қоидаси» кўрсатувида маълум қилинди.

Маълум қилинишича, 8 октябрь куни соат 22:00 ларда вилоятнинг Ғаллаорол тумани ҳудудидан ўтувчи 4Р-38 автомобиль йўлининг 42-километрида Жиззах шаҳар «Зилол» маҳалласида истиқомат қилувчи фуқаро бошқарувида бўлган Nexia-2 Ғаллаорол—Жиззах йўналишида ҳаракатланиб бораётиб, эътиборсизлиги туфайли йўлнинг белгиланмаган жойидан кесиб ўтаётган пиёдани уриб юборган.

Кадр: YouTube

Оқибатда 55 ёшли пиёда олган тан жароҳатлари сабаб Республика шошилинч тез ёрдам илмий маркази Жиззах филиалида вафот этган.

Ҳолат юзасидан Ғаллаорол тумани ИИО ФМБ Тергов бўлимида томонидан тергов ҳаракатлари олиб борилмоқда.

Шунингдек, 14 октябрь куни соат 15:45 ларда Шароф Рашидов тумани ҳудудидан ўтувчи 4Р-35 Жиззах—Пахтакор—Дўстлик—Гагарин автомобиль йўлининг 17-километрида ҳам йўл-транспорт ҳодисаси юз берган. 1994 йилда туғилган ҳайдовчи Damas автомобилини бошқариб кетаётиб, рул бошқарувини йўқотган ва йўл четида тўхтаб турган Matiz’нинг орқа чап томонига келиб урилган. ЙТҲ натижасида Damas қарама-қарши йўналишда ҳаракатланиб келаётган Nexia-2 билан тўқнашув содир этган.

Кадр: YouTube

Авария оқибатида Nexia автомобиль йўлнинг ўнг томонига чиқиб кетиб, ағдарилган, Damas ҳайдовчиси воқеа жойида вафот этган.

Бундан ташқари, 16 октябрь куни соат 03:00 ларда Шароф Рашидов тумани ҳудудидан ўтган М39 Термиз—Тошкент автомобиль йўлининг 988-километрида 33 ёшли сурхондарёлик ҳайдовчи Cobalt автомобилини бошқариб келаётиб ухлаб қолиши натижасида қарама-қарши йўналишдаги Chevrolet Optra’га урилган.

Кадр: YouTube

Авария оқибатида Optra’нинг икки йўловчиси, Cobalt ҳайдовчиси ва машина ичида бўлган тўрт нафар йўловчи турли тан жароҳатлари билан шифохонага ётқизилган. Бироқ Optra ҳайдовчиси ва машина ичида бўлган 41 ёшли йўловчи воқеа жойида вафот этган.

Шу куннинг ўзида соат 19:05 ларда Фориш тумани «Дўстлик» МФЙ ҳудудидан ўтган 4Р36 Жиззах—Фориш—Қизилча автомобиль йўлининг 111-километрида навоийлик ҳайдовчи Nexia-3 автомобилини бошқариб кетаётиб, рул бошқарувини йўқотган ва йўлнинг чап томонига ағдарилган.

Кадр: YouTube

Оқибатда машина ичида йўловчи сифатида ҳаракатланган 2003 ва 2001 йилларда туғилган йўловчилар турли тан жароҳатлари олиб, воқеа жойида вафот этган.

Аввалроқ Тошкентда Nexia қарама-қарши йўналишга чиқиб кетиб, Spark’ка урилиши оқибатида йўловчи ҳалок бўлгани, Қашқадарёда ҳаракатланаётган Nexia’нинг чиқиб кетган ғилдираги бошқа бир ҳайдовчининг ўлимига сабабчи бўлгани, Самарқандда Nexia бетон тўсиққа урилиб, ёниб кетиши оқибатида икки нафар йўловчи воқеа жойида вафот этгани тўғрисида хабар берилганди.