Тошкент шаҳри бош имом-хатиби сифатида ишлаб келаётган Нуриддин Холиқназаров Ўзбекистон мусулмонлари идораси раиси, муфтий лавозимига сайланди. Бу ҳақда Ўзбекистон мусулмонлари идораси хабар қилди.
Маълум қилинишича, 2021 йил 19 октябрь куни Ўзбекистон мусулмонлари идораси Уламолар Кенгашининг кенгайтирилган йиғилиши бўлиб ўтди. Унда ташкилий масала кўрилди, Тошкент шаҳри бош имом-хатиби сифатида ишлаб келаётган Нуриддин домла Холиқназаров Ўзбекистон мусулмонлари идораси раиси, муфтий лавозимига сайланди.
Нуриддин Холиқназаров 1968 йилда Андижон вилояти Асака шаҳрида туғилган. 1992 йилда Бухоро вилоятидаги Мир Араб мадрасаси, 1998 йилда Имом Бухорий номли Тошкент ислом институтини, 2007 йилда эса Фарғона давлат университетини тамомлаган.
Иш фаолиятлари давомида Асака шаҳридаги «Аҳмадали Махдум» масжиди имом-хатиби, Тошкент шаҳри «Оқ тепа» жоме масжиди имом-хатиби, пойтахтдаги «Кўкалдош», Андижон вилоятидаги «Саййид Муҳйиддин махдум» мадрасалари ўқитувчиси, Андижон вилояти бош имом-хатиби ва 2019 йилдан шу кунга қадар Тошкент шаҳар бош имом-хатиби вазифаларида меҳнат қилаётган эди.
Маълумот учун, аввалги муфтий Усмонхон Алимов 15 август куни вафот этганди. Усмонхон Алимовнинг жанозаси Самарқандда ўқилди.
Изоҳ (0)