Ўзбекистонга 2021 йил октябрь ойида COVAX дастури доирасида Pfizer-BioNTech вакцинасидан 800 минг доза ва Sinovac вакцинасидан 1,7 миллион доза олиб келиш кўзда тутилган, деб хабар беради ССВ матбуот хизмати.
Маълум қилинишича, Санитария-эпидемиологик осойишталик ва жамоат саломатлиги хизмати маълумотига кўра, мамлакатнинг ўзида 15,5 миллион доза ZF-UZ-VAC2001 ҳамда 633 минг дозадан ортиқ икки компонентли «Спутник V» вакциналари ишлаб чиқарилиши режалаштирилган.
Умумий ҳисобда 18,9 миллион дозадан ортиқ вакцина келгусида эмлаш жараёнларида қўллаш учун Санитария-эпидемиологик осойишталик ва жамоат саломатлиги хизматига етказилади.
Ҳозир Ўзбекистонда эмлаш бошланганидан бери 28 687 988 доза вакцина келтирилган бўлиб, йил охиригача бу кўрсаткич 47 миллион дозадан ошиши режалаштирилган.
«Ушбу миқдор билан Ўзбекистон аҳолисининг 17,4 миллион нафарини тўлиқ эмлаш мумкин бўлади», — дейилади хабарда.
Эслатиб ўтамиз, 13 сентябрь куни Ўзбекистонга 1,2 миллион дозадан ортиқ Pfizer вакцинаси, 13 октябрь куни эса Туркиядан 200 минг доза Sinovac вакцинаси олиб келинганди.
Мавзуга доир: Абдулазиз Комилов: «АҚШ 5 млн дозадан ортиқ Moderna ва Pfizer вакциналарни беғараз тақдим этганидан миннатдормиз»
Маълумот учун, коронавирус пандемиясига қарши курашиш ва вакцина сотиб олиш учун учун 2021 йил давлат бюджетида 3 триллион сўм захира шакллантирилган эди. Айни пайтда ушбу маблағ тўлиқ ўзлаштирилган. Олий Мажлис Қонунчилик палатасининг 14 октябрь куни бўлиб ўтган йиғилишида коронавирусга қарши курашиш ва вакциналар сотиб олиш учун қўшимча 1,3 триллион сўм ажратилгани маълум қилинди.
