Президентликка номзод Шавкат Мирзиёев Тошкент вилоятида сайловчилар билан учрашувда Алишер Қодировнинг мигрантларни солиқ тортиш ҳақидаги фикрларига муносабат билдирди, деб хабар беради «Дарё» мухбири.

Фото: «Дарё» / Мадина Нурман

«Миллий тикланиш» демократик партиясидан президентликка номзод Алишер Қодиров Андижон вилоятидаги сайловчилар билан бўлиб ўтган учрашувда мигрантлардан ҳам солиқ ундириш таклифини билдирганди. Унинг сўзларига кўра, мигрантлар ҳам Ўзбекистон тараққиёт учун солиқ тўлаши керак.

Шавкат Мирзиёев мигрантларнинг ўз оиласига берган кўмагини, даромад деб солиққа тортиб бўлмаслигини таъкидлаган.

«Номзод сифатида бу масала бўйича ўзимнинг ва партиямизнинг позициясини аниқ айтиб ўтмоқчиман.

Ҳозирда 2,5 миллиондан зиёд фуқароларимиз хорижда меҳнат фаолиятини олиб бормоқда. Улар топаётган даромадларидан хорижда солиқларни тўлиқ тўлаб, қолган қисмини ўз оиласига жўнатмоқда. Бир нарсани аниқ тушуниб олиш керак: бу – солиққа тортиладиган даромад эмас! Фуқаромиз ўз оиласига берган кўмагини, даромад деб солиққа тортиб бўлмайди. Ватандан узоқда меҳнат қилиб, ҳам ўзини, ҳам оиласини боқаётган юртдошларимизга фақат раҳмат айтиш керак.

Шунинг учун ушбу маблағларни яна такроран солиққа тортиш ташаббусига биз мутлақо қаршимиз,

бундай ғоя – партиямиз кун тартибида йўқ ва бўлиши ҳам мумкин эмас! Шу билан бирга, биз чет элда ишлаётган фуқароларни тизимли қўллаб-қувватлаш бўйича бошланган ишларни давом эттирамиз», — дейди Шавкат Мирзиёев.

Шунингдек, Шавкат Мирзиёев мигрантларни «фидойи фарзандларим» деб атаб, агар раҳбар бўлиб ишласа, улар ҳеч қачон солиққа тортилмаслигини қайд этган:

«Мигрантлар менинг фидойи фарзандларим. Бир пайтлар уларга нисбатан нотўғри таъриф ишлатилган эди. Лекин мен бу фикрга қўшилмаганман. Ўзингиз ўйланг, улар нима учун хорижга ишга кетишган? Ноиложликдан! Агар биз бу ерда иш билан таъминлаб берганимизда улар хорижга кетармиди? Йўқ! Мана, 90 йилларда мигрантлар йўқ эди-ку... Агар мен шу юртда раҳбар бўлиб ишласам, улар ҳеч қачон солиққа тортилмайди. Аксинча, уларга Ўзбекистонда шароит яратиб беришга ҳаракат қиламиз».