Дунё ва ўзбек спортига оид 12 октябрь кунининг энг муҳим хабарлари дайжести билан танишинг.

Ўзбекистон

Ўзбекистонлик ёш дзюдочилар ЖЧда 1 та кумуш ва 1 та бронза медал қўлга киритди

Фото: Халқаро дзюдо федерацияси

Италиянинг Олбия шаҳрида 6—10 октябрь кунлари дзюдо бўйича ёшлар ўртасидаги Жаҳон чемпионати бўлиб ўтди.

Мазкур мусобақада Улуғбек Азизов мураббийлигидаги 21 ёшгача бўлган Ўзбекистон терма жамоаси ҳам иштирок этиб, якунда 1 та кумуш ва 1 та бронза медал билан 80 га яқин давлат орасида 11-ўринни эгаллади. Суҳроб Ражабов (-100 кг) кумуш медалга эга чиққан бўлса, Ўткирбек Тўрабоев (-100 кг) бронза медални ўзиники қилди.

Ўзбекистон терма жамоаси ўртоқлик ўйинида Иорданияга йирик ҳисобда мағлуб бўлди

Фото: ЎФА матбуот хизмати

Футбол бўйича Ўзбекистон миллий терма жамоаси ўртоқлик ўйинида 0:3 ҳисобида Иорданияга мағлуб бўлди.

Ўйин давомида айтарлик ҳеч қандай хавфли вазият юзага келтира олмаган Сречко Катанец шогирдлари ўз дарвозаларидан жавобсиз 3 та гол ўтказиб юборди.

Жамоа бунгача 9 октябрь куни Малайзия устидан 5:1 ҳисобида зафар қучганди.

Ўсмирлар ўртасидаги Жаҳон чемпионатида 11 та медал қўлга киритилди

Саудия Арабистонининг Жидда шаҳрида оғир атлетика бўйича ўсмирлар ва қизлар ўртасидаги Жаҳон чемпионати ўз якунига етди.

Фото: Туризм ва спорт вазирлиги матбуот хизмати

Унда иштирок этган Ўзбекистон терма жамоаси 4 тадан олтин ва кумуш ҳамда 3 та бронза, жами 11 та медалга эга чиқди. Бу натижа билан Ўзбекистон делегацияси умумжамоа ҳисобида Россия терма жамоасидан ортда қолган ҳолда Таиланд билан биргаликда 2—3-ўринни эгаллади.

Ўсмирлар ўртасидаги Жаҳон чемпионатида ғолиб ва совриндор бўлган спортчилар:

  • -96 кг: Қурбонмурод Номозов — 3 та олтин;
  • -73 кг: Диёрбек Эрматов — 1 та олтин;
  • -71 кг: Нигора Сувонова — 3 та кумуш;
  • -55 кг: Озода Ҳожиева — 1 та кумуш, 1 та бронза;
  • -61 кг: Хусинбой Матрасулов — 1 та бронза;
  • -71 кг: Севинчой Комилова — 1 та бронза.

Жаҳон

Рамос «ПСЖ»да қачон дебют қилиши маълум бўлди

Фото: «ПСЖ»

«ПСЖ» ҳимоячиси Серхио Рамос Лига 1 нинг 10-туридан ўрин олган «Анжер»га қарши ўйинда майдонга тушиши кутилмоқда, деб ёзди Get French Football News нашри.

Қайд этиш керак, агар Рамос ушбу баҳсда майдонга тушса, бу у учун Париж клубидаги илк ўйин бўлади. У «ПСЖ»га ёзда ўтганидан бери жароҳати туфайли ҳали бирорта ҳам ўйин ўтказгани йўқ.

«ПСЖ» — «Анжер» учрашуви 15 октябрь куни бўлиб ўтади.

Мемфис Депай Патрик Клюйвертнинг рекордини такрорлади

Фото: Getty Images

Нидерландия терма жамоаси ҳужумчиси Мемфис Депай ЖЧ—2022 саралаши доирасидаги Гибралтарга қарши ўйинда (6:0) дубль қайд этди.

Бу Депайнинг терма жамоа сафидаги 2021 йилдаги 13 ва 14-голлари бўлди. Бунга қадар Нидерландия терма жамоаси сафида ҳеч бир ўйинчи бир йил давомида бунча гол урмаган.

Депайгача бу борада энг яхши натижа Патрик Клюйвертга тегишли эди, у 2000 йилда бир йил давомида 12 та гол урганди.

Германия муддатидан олдин ЖЧ йўлланмасини қўлга киритди

Фото: Getty Images

Германия терма жамоаси ЖЧ—2022 саралаш босқичининг 8-турида Шимолий Македонияни мағлуб этди (4:0).

Ҳанс-Дитер Флик шогирдларининг очколари 21 тага етди ва жамоа саралаш ўйинлари якунланишига 2 тур қолганида муддатидан олдин Қатар—2022 йўлланмасини қўлга киритди. Жамоа иккинчи ўриндаги Руминиядан 8 очко илгарилаб кетган.

Шу тариқа немислар Европа қитъасида мундиал йўлланмасига эга чиққан илк жамоага айланди.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!