Мюнхен фожиасидан тирик чиққан, «Манчестер Юнайтед» ва Англия футболи тимсолига айланган сэр Бобби Чарльтон фаолиятига назар

Англия футболи афсонаси сэр Бобби Чарльтон фаолиятининг катта қисмини «Манчестер Юнайтед» сафида ўтказган. «Олтин тўп» соҳиби 1937 йил 11 октябрда Англиянинг Ашингтон шаҳрида таваллуд топган. 84 ёшни қарши олган футболчининг фаолиятига оид қизиқарли маълумотлар тақдим этилади.

Қариндошлари туфайли Бобби Чарльтон болалигиданоқ футбол ўйнай бошлади. 1953 йилнинг бошида Шарқий Нортумберленднинг мактаб жамоаси ўйинларига қатнаша бошлайди. Бир куни ўйинни кузатиб ўтирган «Манчестер Юнайтед» вакили Бобби Чарльтонни ушбу жамоага таклиф қилади.

1954 йил октябрь ойида футболчи «Манчестер Юнайтед» билан профессионал шартнома имзолайди. 1956 йил 6 октябрь санасида Чарльтон «Атлетик»ка қарши дебют ўйинини ўтказади. Биринчи ўйинидаёқ Бобби дубль қайд этади ва «Манчестер Юнайтед»нинг 4:2 ҳисобида ғалаба қозонишига ёрдам беради. Манчестердаги фаолияти давомида Чарльтон 1950 йилларнинг ўрталарида параллел равишда ҳарбий хизматни ҳам ўтайди. Мураббий Мэтт Басби ёрдамида Бобби Манчестердан 90 километр узоқликдаги Шрусбери (Шропшир графлиги) тоғларидаги қуруқлик қўшинлари артиллерия қисмига қабул қилинади. Дам олиш кунлари жамоанинг ўйинларида иштирок этиш ҳуқуқига эга бўлади. 1956/57 йилги мавсумда «Манчестер Юнайтед» сафида чемпионликни қўлга киритади.

Мюнхен трагедияси ва «Манчестер Юнайтед»нинг қайта туғилиши

Чарльтон илк мавсумидаёқ «Юнайтед» билан Биринчи дивизион чемпионлигини қўлга киритди ва Англия Кубоги финалига қадар етиб борди. Финалда эса «Астон Вилла»га имконият бой берилди.

Бир йилдан сўнг Бобби асосий таркибдан мустаҳкам жой эгаллади ва жамоа билан Европа Чемпионлар Кубоги ярим финалига қадар етиб борди. Инглиз жамоаси учун бу яхши натижа эди: бундан олдин Британия клублари халқаро мусобақаларда омадсиз натижалар қайд этарди. 1957/58 йилги мавсумда «Црвена Звезда»га қарши чорак финал учрашувида Бобби Чарльтон дублга эришади. Айнан ўша учрашувдан сўнг «қизил иблислар» уйга қайтаётган вақтда «Мюнхен авиаҳалокати» юз беради ва 23 кишини ҳаётдан олиб кетади (1958 йил 6 февралда Басби шогирдлари жой олган самолёт ҳалокатга учрайди. Бортдаги 44 инсондан 23 нафари ҳалок бўлади, 19 киши эса жароҳатланади). Чарльтон мўъжиза сабаб тирик қолади: у ўтирган ўриндиқ самолётдан 50 метр нарига учиб кетади. Лекин Бобби бош жароҳати ва травматик шок билан қутулиб қолди. Чарльтоннинг жамоадошлари ва бош мураббий Басби узоқ вақт ҳавога кўтарилишдан қўрқиб яшади, Бобби эса ҳеч нарса бўлмагандек самолётда учарди.

Севимли футболчиларидан айрилган «Манчестер Юнайтед» мухлислари учун Чарльтон ягона юлдузга айланди. Мавсум охири манкунианлар учун омадсиз кечди. Англия Кубоги финалида «Болтон»га мағлуб бўлди, Чемпионлар Кубоги ярим финалида Басби шогирдлари «Милан»ни енга олмади.

Мюнхен трагедиясидан сўнг Мэтт Басбига жамоани қайта қуриш учун бир неча йил керак бўлди. Чарльтон бу вақт мобайнида ҳужум чизиғининг асосий қуролига айланиб улгурганди. Ёш Бобби ҳужум ортида ҳам ўзининг энг яхши ўйинларини намойиш этарди. 1958 йилда Чарльтон Англия терма жамоасидан чақирув олади ва биринчи ўйинидаёқ гол уради (Шотландияга қарши ўйинда Англия 4:0 ҳисобида ғалаба қозонади ва Бобби ўша ўйинда ажойиб гол уради). ЖЧ—1958 да эса Чарльтон бирорта ўйинда майдонга тушмайди, бу эса терма жамоанинг мураббийлар штаби танқидлар остида қолишига сабаб бўлади. Кейинги мундиалда Бобби терма жамоанинг асосий футболчиси сифатида иштирок этди. Бу вақт оралиғида «Манчестер Юнайтед» инқироз давридан ўтиб олганди. Мюнхендаги ҳалокатдан сўнг «қизил иблислар»нинг қўлга киритган илк соврини Англия Кубоги—1963 бўлди. Мусобақа финалида Басби шогирдлари «Лестер»ни 3:1 ҳисобида мағлуб этди. 1964/65 йилги мавсумда эса «Манчестер Юнайтед» ниҳоят чемпионликни қўлга киритди. Бир йилдан сўнг эса жамоа бирорта совринга эриша олмади. Лекин Бобби Чарльтон фаолиятидаги энг катта индивидуал совринга эга чиқди.

1960 йилларнинг ўрталари — Чарльтоннинг олтин даври

ЖЧ—1966 дан олдин футболда инқилоб юз берди: терма жамоа устози энди таркибни якка ўзи танлайдиган бўлди. Аввалроқ терма жамоага қўмита аъзолари футболчиларни жалб қиларди. Англия терма жамоаси устози Алф Рамсей ёшларга кўпроқ урғу берди. Англия уйидаги мундиалда ғалаба қозонди, мусобақанинг қаҳрамонларидан бири Бобби Чарльтон эди. Йил охирида эса «Олтин тўп»ни қўлга киритди. Боббининг Жаҳон Чемпионатида атиги учта гол урганига аҳамият бермаслик керак, у ҳужумда эмас ярим ҳимояда ўйнади.

1966/67 йилги мавсумда Чарльтон манкунианлар билан Англия чемпионига айланди. Бир йилдан сўнг эса Европа Чемпионлар Кубоги қўлга киритилди. Финалда ўз даврининг икки буюк футболчиси: англиялик Чарльтон ва португалиялик Эйсебио рақобат олиб борди. «Қора марварид» британияликлар дарвозасига йўл топа олмади, Бобби эса дублга эришди ва якунда манкунианликлар 4:1 ҳисобида ғалаба қозонди. «Манчестер Юнайтед» асосий Еврокубокни қўлга киритган илк инглиз жамоасига айланди.

Бир неча ойдан сўнг Чарльтон яна Европа аренасида порлади. Евро—1968 да инглизлар СССР терма жамоасини 2:0 ҳисобида мағлуб этиб, бронза медали соҳибига айланди. Бир йилдан сўнг Бобби Британия Империяси ордени билан тақдирланди ва терма жамоада юзта ўйинда иштирок этган футболчи сифатида сардорлик боғичи унга топширилди. Умумий ҳисобда сэр Бобби Чарльтон Англия терма жамоасида 106 та ўйинда қатнашиб, 49 та гол муаллифига айланган. 1973 йилгача у Англия тарихидаги энг яхши тўпурар бўлиб турган эди. Англиянинг бошқа бир афсонаси Бобби Мур унинг рекордини янгилади. Чарльтон «қизил иблислар» сафидаги 758 ўйинда 249 та гол уриб, жамоа тарихидаги энг яхши тўпурар бўлиб турганди, токи 2017 йилда Уэйн Руни унинг рекордини янгиламагунча. Чарльтон «Манчестер Юнайтед» сафидаги энг кўп ўйин ўтказган футболчи сифатида ҳам эсланарди. 35 йил мобайнида сақланиб турган бу кўрсаткич 2008 йилда Райан Гиггз томонидан янгиланди.

1966/67 йилги мавсум Чарльтон учун «Манчестер Юнайтед» сафидаги энг сўнгги омадли мавсумга айланди. Жамоа Англия Кубогини қўлга киритди. Шундан сўнг юлдузнинг фаолиятида кескин пасайиш юзага келди, шунда ҳам у терма жамоадан чақирув олади. Чарльтон — 4 та мундиалда иштирок этган ягона англиялик футболчи.

«Манчестер Юнайтед»дан кетиш ва бутсини «михга илиш»

Бобби Чарльтон 1973 йилда 35 ёшида «Манчестер Юнайтед»ни тарк этди. Футболчилик фаолиятини якунлаганидан сўнг сер Бобби «Престон» жамоаси бош мураббийига айланди. Бир йилдан сўнг эса майдонни соғинганини ҳис қилган Чарльтон ўйновчи мураббийга айланади. «Престон» таркибида ўтказган 45 та ўйинида 10 та гол уради. 1975 йилда эса яна бир бор бутсисини «михга илади» ва BBC’да шарҳловчи сифатида фаолият олиб боради. Лекин у яна майдонга қайтди ва 1980 йилга қадар Ирландиянинг «Уотерфорд», Уэльснинг «Бангор», Жанубий Африканинг «Аркадия», Австралиянинг «Ньюкасл» ва «Блектаун» жамоаларида ўйнади.

Ўша йилнинг ўзида Чарльтон «Уиган» президенти этиб тайинланади. 1983 йилдан бошлаб бир муддат жамоа мураббийига ҳам айланди. 1984 йилда Мэтт Басби «Манчестер Юнайтед» директорлар кенгашини тарк этганидан сўнг сэр Бобби Чарльтон унинг ўрнини эгаллайди ва ҳозирги кунда ҳам ушбу лавозимда фаолият олиб бормоқда.

1994 йилда қиролича Елизавета II буюк футболчига рицарлик унвонини беради. Сэр Бобби Чарльтон — Англия миллати фахри. У мунтазам равишда барча халқаро футбол ишларида ватани номидан иштирок этади.

Сер Бобби иккита мундиал (1966 ва 1970 йилги) рамзий терма жамоасига киритилган, турли версияларга кўра дунёнинг энг яхши 100 футболчиси рўйхатидан ўрин олган. Бобби Чарльтон — футболнинг тирик афсонаси. 2018 йилда Жозе Моуриньо «Манчестер Юнайтед» бош мураббийига айлангач, Чарльтон билан учрашувда қуйидаги сўзларни айтган: «Сиз 1966 йилда мамлакатим орзусини барбод қилгандингиз. Шунга қарамасдан, мен сизни жуда ҳурмат қиламан. Кўринишингиз 45 ёшлар атрофидаги инсонни ёдга солади».