Австрия канцлери Себастьян Курц ўз лавозимини тарк этишини эълон қилди, деб ёзади «РБК» Reuters’га таяниб. У Австрия халқ партияси етакчиси ва парламент депутати бўлиб қолади.
Сиёсатчи ўз қарорини «тартибсизлик олдини олиб, барқарорликни таъминлаш» истаги билан изоҳлади. «Ҳозир ишончни қайта тиклаш муҳим… Менинг мамлакатим менга ўз шахсиятимдан кўра муҳимроқ», — деди у. Курц канцлер вазифасини бажарувчи этиб ташқи ишлар вазири Александер Шалленбергни тайинлашни таклиф қилди.
Аввалроқ Австрия прокуратураси Курцга нисбатан порахўрлик ва лавозим бўйича жиноятларга оид айблов бўйича суриштирув бошланганини эълон қилганди. Унинг офисида, партия бош қароргоҳида ва Молия вазирлигида тинтувлар бўлиб ўтди. Тергов ҳаракатлари, хусусан, Курцнинг расмий вакили Ёханнес Фришманн, ОАВ билан ишлаш бўйича масъул ходим Геральд Флейшманн ва маслаҳатчи Штефан Штайнернинг офисларида ўтказилди.
Суриштирув Курц, яна тўққиз киши ва учта ташкилотга нисбатан олиб борилмоқда. Канцлернинг атрофидаги одамлар Österreich газетасига пора бериб, Австрия халқ партияси ҳақида ижобий фикрлардан иборат сўровномалар ҳақида ёзишни сўраганликда гумон қилинди. Тергов версиясига кўра, мансабни суиистеъмол қилиш 2016—2018 йилларда амалга оширилган. Мамлакат Молия вазирлиги нашрдаги реклама эълонларини молиялаштириш учун бюджет маблағларидан фойдаланиб, эвазига у ерга материал жойлаштиришни талаб қилган.
6 октябрь куни кечқурун Курц баёнот билан чиқиб, айбловларни рад этди: «Молия вазирлигида қандай рекламалар ёки сўровномалар буюртма қилингани устидан мен раҳбарлик қилганимни исботловчи мутлақо ҳеч қандай далиллар йўқ». Ўшанда журналистнинг Курц канцлер лавозимида қолиш-қолмаслиги ҳақидаги саволга тасдиқ жавобини берганди.
Бу Курцга нисбатан олиб борилган биринчи суриштирув эмас. Май ойида у «Ибицагейт» деб ном олган сиёсий можаро ҳақидаги иш бўйича ёлғон кўрсатмалар берганликда гумон қилинганди. Можаро 2019 йил майида мамлакат вице-канцлери Хайнс-Кристиан Штрахенинг истеъфосига олиб келган. У Suddeutsche Zeitung ва Spiegel Штрахе Ибицадаги виллада туриб, ўзини россиялик олигархнинг жияни Алёна Макарова деб таништирган аёл билан суҳбатлашаётгани акс этган видеотасвирни эълон қилганидан кейин бошланганди. Видеога кўра, гап баъзи россияликларнинг Штразе сайлов кампаниясига ҳомийлик қилиши ва эвазига ҳукумат буюртмаларига эга бўлиб, Австриянинг Kronen Zeitung газетасини сотиб олиши ҳақида борган. Аёл Россияга алоқаси бўлмаган черногориялик талаба қиз бўлиб чиқди.
Курц Австрия вазирлар маҳкамаси раҳбари лавозимини 2017 йил декабрида эгаллаб, Европадаги энг ёш ҳукумат раҳбарига айланганди: ўша вақтда у 31 ёшда бўлган. 2019 йил майида «Ибицагейт» фонида Австрия ҳукуматига ишончсизлик вотуми эълон қилинган ва канцлер истеъфога чиққан, аммо муддатидан аввалги парламент сайловларида бу лавозимга қайтиб келган.