Тошкенда янги очилган Renessans holl киноконцерт залида Ўзбекистон Кинемотография агентлиги томонидан ўтказилаётган «Ипак йўли дурдонаси» Тошкент халқаро кинофестивалининг тантанали ёпилиш маросими бўлиб ўтди.
Тантанали ёпилиш маросими олдидан ташкиллаштирилган дабдабали қизил йўлакчада ўзбек ва дунё юлдузлари кўриниш берди.
Очилиш маросимида ташкил этилган дабдабали қизил йўлакчада бошловчилар дунё юлдузларини таништираётганда хатоликларга йўл қўйгани, адашиб кетишгани, чет эллик кўплаб актёрлар қизил йўлакчада навбатини кутиб қолишгани танқидларга сабаб бўлган эди.
Ёпилиш маросимида очилиш маросимидаги хатолардан хулоса чиқарилгани тадбир бошидан то сўнгига қадар билиниб турди.
ОАВ ходимларининг интервью олиши учун алоҳида, операторларнинг съёмка қилиши учун алоҳида жойлар ҳозирланган эди. Қизил йўлакчанинг асосий майдонида тўртта бошловчи, DJ ва режиссёрдан бошқа деярли ҳеч ким ҳаракатланмади. Ёпилиш маросимида эса бу борада кўплаб тартибсизликлар кузатилган эди.
Бир соатдан ортиқ давом этган қизил йўлакча маросимида меҳмонларни кутмадик ҳам, куттирмадик ҳам. Улар Range Rover, Mercedes-Benz, Captiva, Malibu, Hyundai, Lacetti каби машиналарда қизил йўлакчада бирин-кетин кўриниш берди.
Кинофестивалнинг очилиш маросимидаги қизил йўлакчадан фарқли ўлароқ, ёпилиш маросимида ўзбек мусиқа ва кино оламининг кўплаб вакиллари меҳмон бўлди.
Ўзбекистон халқ артисти Ёқуб Аҳмедовдан бошлаб токи кино оламига энди кириб келган актёр ва актрисаларнинг кўпчилиги ушбу маросимга келди.
Актёр, режиссёр Алишер Узоқов очилиш маросимига таклиф қилинмагани сабабли видеомурожаат қилган эди. Кўпчилик кино мухлислари ёпилиш маросимида актёрни кутди. Бироқ Алишер Узоқов қизил йўлакчага ҳам, тантанали ёпилиш маросимига ҳам келмади.
Қизил йўлакчада таниқли француз актёри Жерар Депардье кўриниш берди. Актёрдан қизил йўлакчада интервью олишнинг имкони бўлмади. Лекин ферстивал доирасидаги учрашувлардан бирида актёр ўзбек кинематографияси ҳақида «Ўзбекистон ҳукуматининг миллий кинематографияни ривожлантириш борасидаги саъй-ҳаракатлари таҳсинга лойиқ. Кўриб турибмизки, ўзбек кинематографиясининг келажаги сифатида ёшларга катта эътибор қаратилмоқда», — деган фикрларни айтиб ўтган экан.
Фестивальнинг очилиш маросимида, фестиваль доирасидаги бошқа тадбирларда иштирок этган кўплаб дунё юлдузлари ёпилиш маросимига қадар Тошкентда қолмагани сабабли ёпиш маросимида уларнинг аксарияти кўринишмади.
Машҳур француз режиссёри, сценарист ва продюсер Люк Бессон, таниқли француз актёри Жерар Депардье, режиссёр ва продюсер Тимур Бекмамбетов, актёр Александр Ревва, актриса Равшана Куркова, актёр ва спортчи Олег Тактаров, америкалик продюсер, тадбиркор Doors tо Hollywood президенти Боб Ван Ронкел, сингари дунё юлдузлари ёпилиш маросимида қизил йўлакчадан ўтди.
Фестиваль доирасида эса машҳур турк актёрларидан Ўзжан Дениз, Дилан Чичек Дениз, Мелиса Асли Памук, Эржан Кесал, Назан Кесал, Селим Байрактар, Сефа Зенгин, Доғукан Эрдем, Сердан Ўртач, Эркан Колчак, ҳинд актёрларидан Митҳун Чакраборти, Раж Капурнинг ўғли Рандҳир Капур, актриса Рича Чадда, Боман Ирани, Кунал Капур, британиялик режиссёр, сценарист, рассом Оливер Гай-Уоткинс, актёр Алексей Чадов, америкалик машҳур бастакор Уолтер Афанасефф, актёр Стивен Сигал сингари дунё юлдузлари юртимизга меҳмон бўлишди.
«Ипак йўли дурдонаси» Тошкент халқаро кинофестивали 28 сентябрь ва 3 октябрь кунлари бўлиб ўтди.
Изоҳ (0)