Ижтимоий тармоқларда «Даҳшатли воқеа! 8 ойлик ҳомиласи билан келинни бўғизлаб ташлаган» сарлавҳали видеохабар тарқалган. Воқеа юзасидан Бош прокуратура матбуот хизмати маълумот берди.

Аниқланишича, 2021 йил июнь ойида У.Н. Ёзёвон тумани, Ўзбекистон кўчасида жойлашган хонадонлар бирига ғайриқонуний равишда кириб, мол-мулкларни қўлга киритмоқчи бўлган вақтида уйда бўлган ҳомиладор М.Қ. уни кўриб қолганлиги сабабли, уни пичоқ билан бир маротаба уриб, тан жароҳати етказган. Оқибатда М.Қ касалхонада вафот этган.

Мазкур ҳолат юзасидан 2021 йил 23 июнь куни Ёзёвон туман прокуратураси томонидан Жиноят кодексининг 97-моддаси (қасддан одам ўлдириш) ва 164-моддаси (босқинчилик) билан жиноят иши қўзғатилган.

Жиноят иши бўйича 1 нафар шахсга айб эълон қилиниб, унга нисбатан қамоққа олиш тарзидаги эҳтиёт чораси қўлланилган.

Жиноят иши мазмунан кўриб чиқиш учун 2021 йил 16 сентябрь куни Фарғона вилоят судига юборилган.

Бундан аввал Қўқонда телевизорни қайси каналга олиш устида юз берган жанжал оқибатида 17 ёшли йигит акасига 9 марта пичоқ ургани, Самарқандда эр ярашиш таклифини рад этгани учун хотини ва унинг акасини пичоқлагани ҳамда Сирдарёда холасининг уйини ўмаришга келган қиморбоз жиян унинг жойнамоз устидаги ўғлини пичоқлаб ўлдиргани ҳақида хабар берилганди.