Миллионлаб мухлислар қалбидан жой олган, аммо машҳурлик ва муваффақиятлари шахсий ҳаётидаги муаммоларни енгиб ўтишга ёрдам бермаган хонанда Майкл Жексоннинг ҳаёти ҳақида маълумот бериб ўтамиз.
Қийин кечган болалик
Бўлажак юлдуз Индиана штатидаги унча катта бўлмаган шаҳарча — Герида дунёга келган. Болакайнинг мусиқага шайдо бўлган ота-онаси Жозеф ва Кетрин Жексонлар ушбу севгини 9 нафар фарзандининг қалбига жо қилишга уринган. Шу билан бирга оила бошлиғи, яъни ота ҳаддан ортиқ қаттиққўл бўлган, болалари унинг чизган чизиғидан чиқмаган. Кейинроқ Майклнинг тўнғич акаларидан бири отаси уларга мунтазам равишда қўл кўтаргани, сурункали равишда таҳқирлаганини маълум қилган. Онаси эса қўллаб-қувватлаш ўрнига болаларини ташриф буюришдан бош тортиш имконсиз бўлган диний секта йиғилишларига етаклаб борган.
The Jackson 5 гуруҳи ва карьеранинг бошланиши
1964 йилда The Jackson 5 гуруҳига асос солинган. Ундан Жексонлар оиласининг катта фарзандлари ўрин олган. Тито, Жереми ва Жеки вокал ижрочи бўлган, кенжа фарзандлар Майкл ва Марлон эса мусиқий чолғу чалган. Кейинроқ истеъдоди пайқалгач, кичик Майкл гуруҳда бек-вокалчи бўлиб фаолият юритган. Бўлажак юлдуз 1972 йилда яккахон хонанда сифатида карьера бошлаган.
1980 йилларга келиб унинг ижросидаги қўшиқлар деярли барча ерда янграй бошлаган. 1982 йилда тақдим қилинган ва бир неча ўн йил давомида энг кўп сотилган альбом сифатида эътироф этилган Thriller улкан муваффақиятга эришишига сабаб бўлган.
Шахсий ҳаёт
Майкл икки марта турмуш қурган. Илк марта у Элвис Преслининг қизи Лиза Марияга оила қуришни таклиф қилган. 1994 йилда яширинча турмуш қурган жуфтлик 2 йил ўтиб ажрашишган. Айрилиқдан кейин қайта оила қуришга қарор қилган Жексон бу сафар рафиқа сифатида дерматолог-шифокорининг ассистенти Дебби Роуни танлаган.
https://www.instagram.com/p/dKkurxoSLO/?utm_source=ig_embed&ig_rid=02c9888d-fc33-45af-918b-4b3ffb402c7e
Ушбу турмуши давомида икки нафар фарзанд — Принс Майкл Жозеф Жексон, Перис Майкл Кетрин Жексон дунёга келган. Аммо бу турмуш ҳам вақт синовидан ўтмаган, Дебби ва Майкл муносабатларига нуқта қўйишни афзал билган. 2002 йилда поп қироли суррогат она ёрдамида учинчи марта оталик бахтини ҳис қилган — фарзанди Принс Майкл Жозеф Жексон II туғилган.
«Неверленд»ни тарк этиб
Қўшиқчи 1980 йил охирида авлодини давом эттирувчи фарзандлар дунёга келишини орзу қилиб юрган чоғлари Санта-Барбара яқинида қўрғон қурдирган ва унинг атрофини аттракционли боғга айлантирган. Ранчога Майкл томонидан «Неверленд» деб ном берилган ва кейинчалик хонанда ҳақида тарқалган салбий маълумотларнинг аксарияти ушбу жой билан боғлиқ бўлган. 1993 йилда Жексон уйида меҳмон бўлган 13 яшар болага нисбатан зўравонлик қилишда айбланган. Кейинроқ ушбу ҳолат бошқа бир бола билан ҳам такрорланган. Далил-исботлар топилмаган, аммо тарқаб улгурган миш-мишлар ижодкор карьераси ва саломатлигига таъсир қилган. 2019 йил вафотидан 10 йил вақт ўтиб, «Неверлендни тарк этиб» номли фильм экран юзини кўрган. Унда хонанда билан боғлиқ ўша эҳтимолий зўравонлик мавзуси қайта тилга олинган.
Поп қиролнинг касаллиги ва ўлими
Ҳаддан ортиқ даражада машҳур эканига қарамай, Майклни бахтли яшаган деб айтиб бўлмайди. Шахсий ҳаётидаги муаммо ва бир қанча айбловлардан ташқари, хонанда юзининг деформациясига олиб келган витилиго (терининг пигментацияси бузилиши) ҳамда волчанка касаллигидан азият чеккан. Омадсиз жаррорлик амалиётлари вазиятни янада оғирлаштирган.
2009 йил 25 июнь куни мухлислар кутилмаган хабардан ларзага келган — поп қироли даволовчи шифокорининг кўрсатмасига биноан қабул қилган дори воситаси дозасини ошириб юборгани оқибатида ҳаётдан кўз юмган. Дозани ҳисобламагани сабаб тиббиёт ходими 4 йилга озодликдан маҳрум бўлган. Майкл Жексоннинг қизи унинг дафн маросимида: «У фақатгина орзу қилиш мумкин бўлган энг яхши ота эди», деган.
Мавзуга доир:
