Криштиану Роналду «Манчестер Сити»га ўтиши кутилган бир вазиятда барчаси ўзгариб кетди. Ҳаммаси бир неча соат ичида ўзгариб кетди: Криштиану «Манчестер Юнайтед»га қайтадиган бўлди.
The Athletic’нинг маълумотларига кўра, трансфер нархи 15 миллион еврога (+8 миллион бонус) баҳоланган. Роналду эса 2 йиллик шартнома имзолади ва йилига 25 миллион фунт оладиган бўлди.
Қуйида ушбу трансфер тафсилотлари билан танишамиз.
Нега «Юнайтед»?
Криштиану 2003 йилдан 2009 йилга қадар Алекс Фергюсон қўл остида «Манчестер Юнайтед» шарафини ҳимоя қилган. Афсонавий шотландиялик мураббий қўл қовуштириб ўтирмади ва Роналдунинг трансферига ўз ҳиссасини қўшди. Журналист Самюэль Лакҳерстнинг (Manchester Evening News нашрига «Манчестер Юнайтед» бўйича хабарлар ёзади) таъкидлашича, раҳбарият трансфер олдидан Фергюсон билан маслаҳатлашган.Яна бир муҳим жиҳат — бош мураббий Оле-Гуннар Сульшернинг позицияси. 2003 йилдан 2007 йилга қадар бирга ўйнаган жамоадошининг қайтишидан у ҳам хурсанд. Норвегиялик мутахассис 36 ёшли футболчининг улкан тажрибаси ёшлар учун ўрнак бўлади деб ҳисоблайди. Трансфердан бир неча соат олдин у Криштиану ҳақида илиқ фикрлар билдирганди.
Биз доим яхши муносабатда бўлганмиз. Бруну Фернандеш у билан суҳбатлашган. Роналду ҳақида биз қанақа фикрда эканлигимизни у билади. Криштиану ‘Ювентус’дан кетаётган бўлса, бизни қаердалигимизни билади. Роналду — ‘Манчестер Юнайтед’ афсонаси. У билан бирга ўйнаш шарафига муяссар бўлганман. Кўрамиз, буёғи нима бўлар экан.Кришнинг ўзи ҳам қайтаётганидан хурсанд. «Қойилмақом камбэкка тайёрман», — деб агентига мурожаат қилгани ҳақида хабар қилди Фабрицио Романо.Оле-Гуннар Сульшер, «Манчестер Юнайтед» бош мураббийи
Аввалроқ Криштианунинг «Реал»га қайтмаслигини айтган Карло Анчелотти ҳам ўз фикрини билдириб ўтди: «Роналдунинг ўзи севган жамоага қайтаётгани, албатта, яхши хабар».
Sky Sports журналисти Кейв Колиҳолнинг айтишича, «Манчестер Юнайтед»дан таклиф бўлгач, Роналду дарҳол бошқа таклифларни рад этган. Манкунианлар ушбу ёзда Криштиану трансферини режалаштирмаган эди. «Ювентус» уни қўйиб юбормаслигига ишонарди. Аммо имконият пайдо бўлиши билан манчестерликлар трансфер учун курашга қўшилди.
«Манчестер Юнайтед» ким биландир хайрлашадими?
Жейдон Санчо ва Рафаэл Варанни харид қилган «Манчестер Юнайтед» трансфер бозорида анча жарангдор иштирок этди. Энди клуб маошларни тўлаши учун янада кўпроқ пул зарур.Хабарларга кўра, 7-рақам эгаси Эдинсон Кавани жамоада қолади. «Вест Ҳэм» Жесси Лингардни ўз сафига қўшиб олиш истагида. Лекин Сульшер англиялик футболчига ишонишини айтиб ўтди.
«У ҳали ҳам режаларимга киради. Лингардни ‘Юнайтед’ сафида кўришни хоҳлайман. Ўтган мавсум охирида ‘Вест Ҳэм’ таркибида нималар қилганини ҳамма кўрди. Жесси ўзига ишонган ҳолда таркибга қайтди. У жамоада қолади ва асосий таркиб учун курашади», — деди Сульшер.
Роналду «Ювентус» билан қандай хайрлашди?
Португалиялик футболчининг «Ювентус» билан шартномаси 2022 йилда якунига етиши керак эди. Аммо томонлар ҳозир алоқаларни узишга рози бўлди. Туринликлар коронавирус пандемияси сабаб молиявий инқирозга учради. Маошлар ва харажатларни камайтириш борасида бош қотираётганди. Лекин клуб португалияликни сотиши ҳақида ҳеч қаерда эълон қилмади.Криштиану Италиядаги барча мусобақаларда ғолиб бўлди. Аммо Чемпионлар Лигаси совринини қўлга киритиш насиб этмади. Янги мавсум бошида жамоадан кетмоқчилигини айтди. Пайшанба куни Жорже Мендеш Туринга учиб келди. «Ювентус» агентга футболчига харидор топиш учун бир неча соат вақт берди.
Жума куни Роналду «Ювентус» базасига ташриф буюрди ва жамоадошлари билан хайрлашиб, 40 дақиқадан сўнг у ерни тарк этди. Бош мураббий Массимилиано Аллегри футболчи жамоани тарк этаётганини тасдиқлади: «Роналду қайдномага кирмайди. Кеча у менга энди жамоада ўйнамаслигини айтди. Бугун машғулотларда ҳам иштирок этмади. Криштианудан хафа эмасман. У ‘Ювентус’ни тарк этишни хоҳлади, бу унинг танлови. Ҳозир янги жамоа изламоқда. Ҳаёт шунақа экан».
Куннинг иккинчи ярмида Роналду Туринни тарк этди.
«ПСЖ» ва «Манчестер Сити»га нима бўлди?
Месси ва Роналдуни бир жамоада кўришнинг имкони бўлмади. Париж жамоаси хўжайини Носсир ал-Ҳалайфи Роналду билан шартнома имзоланмаслигини тасдиқлади.«Манчестер Сити» эса шартнома таклиф қилишга улгурмасдан, трансфер учун курашдан чиқди. «Шаҳарликлар» бош мураббийи Хосеп Гвардиола португалиялик футболчи жамоага мослашиб кетишига шубҳа билан қараган.
Лекин Пепнинг ўзи футболчининг ўзи қарор қабул қилиши ҳақида гапирганди: «Қаерда ўйнашни Криштианунинг ўзи ҳал қилади. Роналду ва Месси ажойиб футболчилар. Улар — охирги 20—30 йилликнинг энг яхши футболчилари».
Криштианунинг «шаҳарликлар» сафига ўтиши мумкинлигини эшитган Рио Фердинанд ҳайрон қолди. Пайшанба куни у Роналдуга қўнғироқ қилиб, «Манчестер Сити»га ўтмаётганини айтишни сўраган.
«Ундан ‘Манчестер Сити’га ўтмаётганини тасдиқлашини сўрадим. Роналду ‘Йўқ’ деган жавоб айтишини кутгандим. Фарзандларим Роналдунинг ‘Манчестер Сити’ формасини кийганини кўришини истамайман.
Агар ‘Юнайтед’ ва ‘Сити’ билан бир стол атрофида ўтириб, ‘Сити’ни танласа, биз хафа бўлишимиз учун сабаб бўларди. У ‘Манчестер Юнайтед’дан бошқа жамоани танламаслиги аниқ эди. Роналду қадриятларни ҳурмат қилади».
«Манчестер Юнайтед» Криштиану Роналду билан келишувга эришганини эълон қилди. Роналду яқин орада Манчестер клубида тиббий кўрикдан ўтиб, шартнома имзолайди.
Изоҳ (0)