Тошкент шаҳрида Paynet шохобчасида ишловчи йигит раҳбарига тегишли пулни тотализаторда ютқазиб қўйиб, ўзини пичоқлади, дея хабар бермоқда Олий суд ахборот хизмати.
Маълум қилинишича, Тошкентда Н.Р. Paynet шохобчасида ишлаб туриб, кассадаги, дўкон эгаси Н.Т.га тегишли бўлган, 6 миллион сўм миқдоридаги пулни ижтимоий тармоқдаги виртуал ўйинга тикиб, ютқазиб қўяди.
Шундан сўнг у пулларни қайтара олмаслигини билиб, дўкондаги шкаф тортмасида турган пичоқ билан ўзининг қорин соҳасига тан жароҳати етказиб, ИИББга телефон қилган ҳамда гўёки номаълум шахс унга пичоқ билан тан жароҳати етказиб, дўкон кассасидаги 6 миллион сўмни босқинчилик йўли билан тортиб олганини айтган.
Суд томонидан Н.Р. Жиноят кодексининг 237-моддаси 2-қисмининг «а» ва «г» бандларида (айбловнинг сунъий далилларини вужудга келтирган ҳолда оғир ёки ўта оғир жиноят содир этишда айблаб содир этилган ёлғон хабар бериш) кўрсатилган жиноятни содир этганликда айбли деб топилди ва шу моддага 57-моддасини (енгилроқ жазо тайинлаш) қўллаб, унга 2 йил озодликни чеклаш жазоси тайинланди.
Бундан аввал Самарқандда ўғирлаган қарийб 20 миллион сўмни тотализаторга тикиб юборган йигитга жиноят иши қўзғатилгани, ўзбекистонлик аёл эрининг 400 миллион сўмини тотализаторда ютқазиб қўйгани ҳамда Фарғонада ўзганинг пластик картасидан пул ўғирлаб, уларни тотализаторга тикиб юборган мактаб ўқувчиси судлангани ҳақида хабар берилганди.
