Тез орада Тошкент метро бекатларида барча алоқа компаниялари ва бепул Wi-Fi ишлай бошлайди. Бу ҳақда Транспорт вазирлиги ва «Тошкент метрополитени» ДУК мутасаддилари иштирокида АОКАда ўтказилган брифингда маълум қилинди.
Метрополитендаги хизматлар турларини кўпайтириш мақсадида бугунги кунда метрополитен барча бекатларида мобил алоқа воситаси (Ucell) ва бепул интернет тармоғи (Wi-Fi) ишлаяпти.
Метрополитен мутахассислари томонидан бошқа мобил алоқа операторларини жалб қилиш бўйича ишлар олиб борилмоқда.
Тошкент метрополитени йўловчилар билан тўғридан-тўғри ва энг муҳими, тезкор мулоқотни йўлга қўймоқчи. Бунинг учун яқин кунларда «Метрополитен–йўловчи» портали очилади. Ушбу портал орқали барча йўловчилар метрополитен фаолияти бўйича таклиф ва эътирозларини билдириши мумкин бўлади.
Бундан аввал Тошкент метросининг барча йўналишлари 30 августдан бошлаб соат 05:00 дан 00:00 гача ишлаши ҳамда Россиядан Тошкентга 20 та янги метро вагонлари юборилгани ҳақида хабар берилганди.
Изоҳ (0)