Marvel Анжелина Жоли, Сальма Хайек ва Кит Харингтон ижросидаги «Абадийлар» фильмининг финал трейлерини эълон қилди

Marvel студияси миллионлаб йиллар Ер сайёрасида яшаган, бироқ инсонлар ўртасидаги можароларга аралашмаган қудратли ирқ ҳақидаги «Абадийлар» фильмининг якуний трейлерини намойиш этди, деб хабар беради Esquire.

Эълон қилинган трейлердан тушуниш мумкинки, Таноснинг черткисидан кейин коинотдаги ҳаётнинг ярми йўқ қилинган ва уларнинг яна ҳаётга қайтиши абадийларни ўзини кўрсатишга мажбур этган, чунки ҳосил бўлган энергия уларнинг ёвуз қариндошлари — девиантларни уйғотиб юборган.

Шунингдек, трейлерда «оламлар кушандаси» — суперёвуз Галактус ҳам кўрсатилган. Бунга қадар у «Фантастик тўртлик: кумуш сёрфер»да (2007 йил) фильмида улкан космик булут шаклида кўриниш берган эди.

Фильмда Анжелина Жоли, Сальма Хайек, Кит Харингтон, Ричард Медден, Кумейл Нанжиани, Жемма Чан каби таниқли актёрлар рол ижро этган.

«Абадийлар» фильмининг режиссёри — Хлоя Чжао. Унинг «Кўчманчилар ери» (2020 йил) фильми учта «Оскар» мукофотини қўлга киритган — энг яхши фильм, энг яхши режиссёрлик иши ва энг яхши аёл роли (Френсис Макдорманд).

Картинанинг премьераси 27 октябрь санасига режалаштирилган.

Аввалроқ Disney Скарлетт Йоханссон иштирокидаги барча лойиҳаларни якунлашга қарор қилгани, «Тахтлар ўйини» юлдузи Эмилия Кларк Marvel кинооламининг янги суперқаҳрамонига айлангани тўғрисида хабар берилганди.