Фильмдаги образи учун қиёфасини таниб бўлмайдиган даражада ўзгартирган актёр ва актрисалар (фото)

Либослар, грим ва компьютер графикаси баъзида шундай мўъжизалар яратадики, ҳатто энг машҳур актёрларни ҳам танимай қоламиз. Фильмни бир неча марта кўргандан кейингина бош ролни Киану Ривз, Венсан Кассел ёки Стенли Туччи ўйнаганлигини билиш мумкин.

AdMe нашри севимли актёрларни таниш деярли имконсиз бўлган роллари билан таништиради.

Киану Ривз — кўппак бола («Мажруҳлар»)

Голливуднинг энг келишган актёри биринчи марта бундай рол ижро этиши эмас, лекин бу образ энг ғайриоддийлардан бири. Ривз фильмда ақлдан озган олим қўлидаги йиртқич ҳайвонлардан бирини ўйнайди. Гарчи унинг исми фильм титрида келтирилмаган бўлса ҳам, бу рол учун Киану 1 миллион доллар гонорар олган.

Райан Рейнолдс — Дедпул («Х одамлар: Ибтидо. Росомаха»)

Райан Рейнолдс ҳар доим Дедпул ролини орзу қилган, бу образ учун кейинчалик алоҳида фильм ҳам ишланади. Шу сабабли ҳам актёр «Х одамлар» сценарийси эълон қилингач, дарҳол ушбу ролни унга беришларини илтимос қилиб, киноижодкорларга мурожаат қилган.

Гай Пирс — тадбиркор чол («Прометей»)

Дастлаб режиссёр бу ролга ўша пайтда 83 ёшда бўлган Макс Вон Сидовни таклиф қилмоқчи бўлган. Аммо фильмда қаҳрамоннинг ёшлиги кўрсатиладиган саҳна ҳам бўлган. Шу сабабли ролга Гай Пирс чақирилади, гарчи кейинчалик ўша эпизод сценарийдан олиб ташланган бўлса ҳам.

Билли Кристал — сеҳргар («Малика келин»)

Бу образни яратишда визажистларга ёрдам бериш учун Билли бувисининг фотосуратларини олиб келади. Рол шу қадар кулгили бўлганки, фильм режиссёри Билли Кристал ҳар сафар ролини ўйнаганда суратга олиш майдонидан қаҳ-қаҳ отиб чиқиб кетган.

Дэвид Тюлис — Арес («Мўъжиза аёл»)

Фильм режиссёри Патти Женкинснинг сўзларига кўра, у картинанинг кулминацион нуқтасини бундай тасаввур қилмаган. Гарри Поттер фильмларидаги профессор Люпин роли билан эсда қолган Дэвид Тюлис қўрқинчли зирҳ киймаслиги керак эди. Бироқ Warner Bros. раҳбарияти саҳна худди шундай бўлишини талаб қилган.

Роуз МакГоуэн — мушук костюмли официант («Маймун суяги»)

Бу фильм актриса карьерасидаги энг омадли фильм эмас, уни кўпчилик «Мафтункорлар» фильмидаги Пейж роли билан эслайди. Танқидчилар ушбу комедия ҳақида жуда кўп салбий фикрлар билдиришган. Шунга қарамай, Роуз ижобий ҳис-туйғуларни уйғотишга муваффақ бўлган, унинг қаҳрамони томошабинларга визуал завқ бағишлаган.

Стенли Туччи — сарой бастакори («Соҳибжамол ва махлуқ», 2017)

Инсон қиёфасидаги Стенли Туччини фақат фильмнинг бошида ва охирида кўриш мумкин. Фильмнинг кўп қисмида у клавесин (фортепианога ўхшаш қадимий чолғу асбоби) ролида бўлган. Айтганча, машҳур сюжетнинг аввалги фильм версияларида бу қаҳрамон кўринмаган.

Венсан Кассел — Махлуқ («Соҳибжамол ва махлуқ», 2014)

Бу фильмда ҳам барча фильмларидаги каби режиссёр Кристоф Ган ҳам визуал дизайнга катта эътибор берган. Шунинг учун махлуқ ниқобини яратиш ишларига жиддий ёндашилган. Дастлаб ниқоб қўлда ясалган ва кейин рақамли технологиялар ёрдамида Касселнинг юзига қопланган.

Хавер Бардем — кибержиноятчи («007: Skyfall координаталари»)

Кастинг бошида Хавер Бардем режиссёр Сем Мендесга қаҳрамонининг кўринишини, айниқса, соч ва кўзларининг рангини ўзгартирмоқчи эканлигини айтади. Суратга олиш жараёнининг биринчи кунида Бардемни ҳеч ким танимаган. Актёрнинг сариқ сочлари – парик, шунингдек, сохта жағдан ҳам фойдаланилган.

Тэйлор Свифт — мушук («Мушуклар»)

Фильмдаги машҳур хонанданинг роли унчалик катта бўлмаса-да, аммо эсда қоларли бўлган. Албатта, у фильмда қўшиқ куйлаган. Фильм унчалик муваффақиятли чиқмаган, аммо Тэйлор Свифт «бу ғалати фильм»да суратга тушганидан афсусланмаслигини таъкидлайди.

Майкл Шин — клуб эгаси («Трон: Мерос»)

Майкл Шин – «Трон» асл нусхасининг ашаддий мухлиси бўлган. Шунинг учун уни фильмда ўйнашга таклиф қилишганда у иккиланмасдан таклифни қабул қилган. Актёр илҳом олган қаҳрамонлардан бири — Дэвид Боуининг 5- ва 6-альбомларининг қаҳрамони, инсонпарвар марслик Зигги Stardust бўлган.