«Ўзтемирйўлйўловчи» акциядорлик жамияти раҳбарияти сўнгги йилларда йўловчиларга сифатли хизмат кўрсатиш борасида бошқа транспорт турлари билан соғлом рақобатни йўлга қўйган ҳолда қатор ишларни амалга ошириб келмоқда.
Бугунги кунда нафақат юртимиз фуқароларига, балки хориждан ташриф буюрувчи сайёҳларга ҳам янада қулайлик яратиш ва ички ҳамда ташқи туризмни ривожлантириш мақсадида, ҳудудларда янги йўналишлар бўйича қатновлар жорий этилганини алоҳида қайд этиш ўринли.
Бунгунги кунда Термиз—Хива—Термиз, Андижон—Нукус—Андижон, Тошкент—Наманган—Андижон, Қўнғирот—Хива, Термиз—Дарбанд, шунингдек, Андижон—Хива—Андижон, Тошкент—Термиз—Тошкент, Тошкент—Олот—Тошкент, Тошкент—Шовот—Тошкент йўналишларида поездлар қатнови амалга оширилмоқда.
Бу яратилган имкониятлар ўз навбатида юртдошлар ҳамда мамлакатга ташриф буюраётган меҳмонларимизга диёримизнинг муқаддас қадамжолари, тарихий шаҳарларига саёҳат қилиш имкониятини яратмоқда.
«Темир йўл транспортидан фойдаланаётган йўловчиларга яратилган қулайликлардан яна бири — бу рақамлаштириш жараёни бўлиб, чипталарни расмийлаштиришда электрон тизим ишлаб чиқилди ва ҳаётга татбиқ этилди. Буни бевосита таъриф этадиган бўлсак, ўтган йилдан шу кунга қадар бир қанча электрон имкониятлар яратилиб, йўловчиларни вокзал чиптахоналарига келиб сарсон бўлмаслиги учун электрон йўл чипталарини сотиб олиш йўлга қўйилди. Жумладан, бундан икки йил муқаддам йўловчиларга мобил телефонлар орқали электрон йўл ҳужжати сотиб олиш имкониятлари яратилган эди, яъни мобил иловалардан iOS ва Android тизими самарали йўлга қўйилди. Шунингдек, ўтган йилнинг бошида йўловчилар темир йўл чиптахоналарига бормасдан, веб-сайт ёки мобил илова орқали ҳам йўл ҳужжатларини қайтариш имконияти яратилди.
Шу билан бирга, корпоратив картага харид қилинган электрон чипталарни расмийлаштириш пайтида электрон ҳисоб-фактура автоматик тарзда СТИР кўрсатилган ташкилотга юбориш имкониятлари яратилди. Шундан сўнг ‘Ҳамкорбанк’ ва PayMe хизмати тизими орқали тўловларни амалга ошириш имкониятлари йўлга қўйилди», — дейди «Ўзтемирйўлйўловчи» акциядорлик жамиятининг маркетинг ва сервис хизматлари директори Суннат Ҳамидов.
Шунинг асносида Click тизими орқали тўловларни амалга ошириш, юридик шахслар учун эса корпоратив банк пластик картаси орқали тўловларни ўтказиш хизмати ишлаб чиқилди. Орадан ҳеч қанча вақт ўтмасдан Stripe (VISA, Mastercard) тизими орқали ҳам тўловларни амалга ошириш имконияти самарали амалга оширила бошланди.
Йўловчилар Facebook ва Telegram ижтимоий тармоқлари орқали рўйхатдан ўтиб, электрон йўл ҳужжатларини сотиб олиши учун қўшимча қулайликлар ишлаб чиқилди ва амалиётга татбиқ этилди. Ҳозирги кунда электрон тарзда харид қилинган барча йўналишлардаги йўл чипталарини А-4 форматдаги қоғозга чоп этиб, тўғридан-тўғри поездга чиқиш имконияти мавжуд.
Шунингдек, электрон чипта харид қилган йўловчиларнинг вокзалга кириши ва поездга чиқишида ортиқча вақт йўқотмаслигини таъминлаш мақсадида, биринчи босқичда Тошкент марказий вокзалининг бирламчи назорат пункти ва Тошкент—Самарқанд йўналишидаги «Афросиёб» поезди стюардессалари чипталарни назорат қилиши учун махсус замонавий ускуналар билан таъминланди. Кейинги босқичда барча темир йўл вокзаллари ҳамда йўловчи поездларининг вагон кузатувчилари ана шундай замонавий ускуналар билан таъминланиши кўзда тутилган.
«Ўзбекистон темир йўллари» акциядорлик жамияти томонидан 2021—2023 йилларда йўловчи ташиш соҳасини ривожлантириш мақсадида ҳам кўпгина кўзга кўринарли ишларни амалга ошириш режалаштирилмоқда.
Хусусан, «Ўзбекистон темир йўллари» акциядорлик жамияти томонидан туризм инфратузилмасини янада ривожлантириш, транспорт хизматларига ошиб бораётган талабни қондириш, транспорт логистикасини ривожлантириш, ички ва ташқи йўналишларни кенгайтириш юзасидан тизимли чора-тадбирлар амалга оширилмоқда.
«Афросиёб» электропоездларига чипталар танқислигини бартараф этиш мақсадида 2021 йилнинг сентябрь ойидан яна иккита юқори тезликда ҳаракатланувчи электропоезд йўлга қўйилиши кўзда тутилган.
Шунингдек, «Ўзбекистон темир йўллари» акциядорлик жамияти 2020—2022 йилларда темир йўл транспорти инфратузилмасини янада такомиллаштириш, йўловчиларга хизмат кўрсатиш сифатини ошириш, аҳолини темир йўл транспортига бўлган эҳтиёжини қондириш мақсадида 15 та электропоезд ва 5 та дизель поезди харид қилиниб, шаҳарлараро йўналишларда йўлга қўйилиши режалаштирилган.
Транспорт вазирлиги матбуот хизмати
Изоҳ (0)