«Толибон» Афғонистон ҳукумати амалдорларига умумий амнистия эълон қилди ва давлат органларининг фаолиятини қайта тиклашга чақирди. Бу ҳақда «Толибон» тарқатган баёнотга асосланиб, «РБК» хабар берди.
Фото: AP Photo
«Ҳамма учун умумий амнистия эълон қилинди, шунинг учун сиз тўлиқ ишонч билан одатий ҳаётингизга қайтишингиз керак», — дейилади баёнотда.
15 август куни «Толибон» жангарилари Кобулда президент саройини эгаллаб, Афғонистон устидан тўлиқ назорат ўрнатганини эълон қилгач, президент Ашраф Ғани мамлакатни тарк этди. У қатлиом содир бўлмаслиги учун истеъфога чиққанини айтди.
Ўз навбатида, Афғонистон вице-президенти Амрулла Солиҳ мамлакатда халқ билан қолишини маълум қилди. «Ўз еримда. Халқ билан бирга. Сабаб ва мақсад билан. Ҳақиқатга қатъий ишонч билан. Бизнинг қонунчилигимиз — Покистон томонидан қўллаб-қувватланаётган зулм ва шафқатсиз диктатурага қарши туриш», — деди у. Аввалроқ у ҳеч қачон «Толибон» жангарилари олдида бош эгмаслигини айтганди.
Афғонистоннинг Pajhwok агентлиги хабар беришича, Ашраф Ғани қочиб кетганидан кейин собиқ ҳукуматдаги юқори лавозимли амалдорларнинг аксарияти ва кўплаб афғон сиёсатчилари мамлакатни тарк этган. Агентлик таъкидлашича, сиёсий элитанинг бир қисми Афғонистонда қолган, улар янги сиёсий инқирознинг олдини олиш, ҳукуматдаги бўшлиқни тўлдириш ва уни тинч йўл билан топшириш ниятида.
Pajhwok маълумотларига кўра, Ғани, унинг миллий хавфсизлик бўйича маслаҳатчиси Ҳамдуллоҳ Моҳиб ва президент маъмуриятининг собиқ раҳбари Фазл Маҳмуд Фазли аввал Тожикистонга, ундан кейин Уммонга учиб кетган.
Илгари Балх вилоятида «Толибон»га қарши уруш эълон қилган таниқли сиёсий арбоблар маршал Абдурашид Дўстум ва Ато Муҳаммад Нур «Толибон» мамлакат шимолидаги асосий шаҳар — Мозори Шарифни эгаллаб олгач, Тожикистонга қочиб кетган. Афғонистон Миллий хавфсизлик кенгаши раисининг собиқ ўринбосари Серур Аҳмад Дуррани АҚШга жўнаб кетди, президентнинг қонун бўйича бош маслаҳатчиси Кабир Исса Ҳел эса Буюк Британияга кетди. Мудофаа вазири Бисмиллаҳ Муҳаммадий Дубайга, Ҳирот вилоятидаги халқ лашкари раҳбари Муҳаммад Исмоилхон Эронга жўнаб кетди.
Бундан ташқари, Pajhwok хабарига кўра, Халқ палатаси (парламент қуйи палатаси) спикери Мир Раҳмон Раҳмоний бошчилигидаги афғон сиёсатчиларидан иборат катта делегация Покистон раҳбарияти билан Афғонистонда тинчлик ва барқарорликни таъминлаш масалаларини муҳокама қилиш учун Покистонга йўл олган.
Ўз навбатида, Афғонистоннинг собиқ президенти Ҳамид Карзай, Миллий ярашув Олий кенгаши раҳбари Абдулла Абдулла ва Афғонистон Ислом партияси раҳбари Гулбеддин Ҳикматёрлар ҳокимиятни «Толибон»га тинч йўл билан топшириш учун Мувофиқлаштирувчи кенгаш тузган.
Pajhwok’нинг ёзишича, Афғонистондаги тожиклар жамиятининг нуфузли раҳбари Аҳмад Шоҳ Массуднинг ўғли Аҳмад Масуд, собиқ биринчи вице-президент Амрулла Солиҳ ва бошқа бир қанча нуфузли сиёсатчилар Афғонистоннинг «Толибон» ҳали етиб бормаган Панжшир вилоятида бўлиб турибди. Улар «Толибон»га қаршилик кўрсатувчи куч ташкил қилиш ниятида.
16 август куни The Washington Post (WP) газетаси АҚШ ва Афғонистондаги манбаларга таяниб, «Толибон» афғонистонлик амалдорларга қурол эвазига пора бергани ҳақида ёзганди.
Шунингдек, «Толибон» аъзолари Кобулдаги вазиятни ўз назоратига олгач, жиноятларга алоқадор кимсаларни ҳибсга олишни бошлагани хабар қилинди. Ташкилот расмий вакили Забиҳулло Мужоҳиднинг сўзларига кўра, ҳеч кимга собиқ амалдорларнинг уйига кириши, уни вайрон қилиши, улардан машина талаб қилиши ёки одамларга таҳдид қилишига рухсат берилмаган. Бундай кимсаларга жиддий тарзда муносабатда бўлинади ва улар жиддий таъқибга учрайди.
