Талабанинг ўқишини Тошкент давлат юридик университетига кўчириб бермоқчи бўлган фирибгар ушланди, дея хабар қилмоқда Бош прокуратура ҳузуридаги Департамент матбуот хизмати.
Фото: Бош прокуратура ҳузуридаги Департамент матбуот хизмати
Департамент ҳамда ДХХнинг Жалақудуқ тумани бўлимлари томонидан ўтказилган тезкор тадбирда фуқаро Л.Н. фуқаро М.нинг Қирғизистоннинг Жалолобод шаҳридаги замонавий халқаро университетидаги ўқишини юқори лавозимда ишловчи танишлари орқали Тошкент давлат юридик университетига кўчириб бериш эвазига 3000 АҚШ долларини фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Самарқандда фуқарони 17 минг доллар эвазига магистратурага киритиб қўйишни ваъда қилган шахс ушлангани, Facebook’да ўзини Коррупцияга қарши курашиш агентлиги ходими сифатида таништирган шахс фуқарони 11 минг долларга чув туширгани ҳамда Тошкент, Бухоро ва Самарқандда фуқароларни ўқишга киритиш ҳамда ўқишини кўчириб бериш билан шуғулланмоқчи бўлган шахслар ушлангани ҳақида хабар берилганди.
