Марказий Осиё давлатлари раҳбарларининг Маслаҳат учрашуви доирасида Туркманбоши шаҳрида ушбу мамлакатларнинг миллий саноат маҳсулотлари кўргазмаси ташкил этилди.
Ўзбекистон Президенти Шавкат Мирзиёев, Туркманистон президенти Гурбангули Бердимуҳамедов, Қозоғистон президенти Қосим-Жўмарт Тўқаев, Қирғизистон президенти Садир Жапаров ва Тожикистон президенти Эмомали Раҳмон мазкур кўргазмани бориб кўрди.
«Made in Uzbekistan» экспозициясида Ўзбекистоннинг озиқ-овқат, тўқимачилик, автомобилсозлик, чарм-пойабзал, электр техникаси, кимё, фармацевтика, заргарлик ва қурилиш материаллари каби саноат тармоқлари салоҳияти намойиш этилган.
Кўргазмадан Қозоғистон, Қирғизистон, Тожикистон ҳамда Туркманистон маҳсулотлари ҳам ўрин олган. Экспозициялар 8 минг квадрат метрдан зиёд майдонни эгаллаган.
Президентлар маҳсулотлар сифатини кўздан кечириб, ўзаро товарлар етказиб бериш, саноат кооперациясини кенгайтириш бўйича мутасаддиларга кўрсатмалар берди.
Бундан аввал Шавкат Мирзиёев Туркманистон президенти Гурбангули Бердимуҳамедов билан учрашув ўтказгани ҳамда Қирғизистон президенти Садир Жапаров билан музокара ўтказгани ҳақида хабар берилганди.
Изоҳ (0)