Вакцинадан кейин ҳар 1000 та эмлангандан 4 тасида ножўя таъсирлар бўлиши эҳтимоли меъёр сифатида тан олинган. Бу ҳақда АОКАда бўлиб ўтган брифингда Коронавирусга қарши курашиш штаби аъзоси Нурмат Отабеков маълум қилди.
– Аҳолидан вакциналарнинг сифатсизлиги, уларнинг ножўя таъсирлари юзасидан шикоятлар ҳам бўлиб турибдими?
«Вакциналардан кейин ножўя таъсирлар бўлиши эҳтимоли бор. Булар нималар бўлиши мумкин? Бу – қон босими, тана ҳарорати кўтарилиши, эмланган жойда оғриқ, қичишиш пайдо бўлиши, тошма тошиши ва ҳолсизланиш каби белгилар пайдо бўлиши мумкин.
Шу боис ҳам коронавирусга қарши эмлаш штаби қошида махсус ишчи гуруҳ тузилган ва у ҳар битта ножўя таъсирлар бўйича ахборотларни жойлардан олиб, уларни мониторинг қилиб боради. Ҳар 1000 та эмлангандан 4 тасида ножўя таъсирлар бўлиши эҳтимоли меъёр сифатида тан олинган, негаки биз организмга бегона оқсилни киритаётган эканмиз, албатта, организм унга муносабат билдириши керак бўлади», – дейди Нурмат Отабеков.
Бундан аввал Ўзбекистонда сўровнома ўтказилиб, фуқароларнинг қанчаси коронавирусга қарши вакцина олишни хоҳламаслиги аниқлангани, ССВ Ўзбекистонда «Спутник V» вакцинасининг иккинчи дозаси қолмаганига муносабат билдиргани ҳамда ЖССТ қайта эмлашга мораторий талаб қилгани ҳақида хабар берилганди.
Изоҳ (0)