Ўзбекистонлик ҳужумчи Элдор Шомуродов Италиянинг қадимий ва машҳур клубларидан бири «Рома» футболчисига айланди. «Бўрилар» сафида доим ўзига хос ҳужумчилар ва гол уришни ёқтирадиган ярим ҳимоячилар бўлган. Ушбу саҳифада «Рома» тарихидаги энг яхши тўпурарлар ҳақида сўз боради.

«Рома» — 1927 йил 7 июнда ташкил топган профессионал жамоа. Уй ўйинларини Римнинг «Олимпико» стадионида ўтказади. Клуб ташкил этилганидан буён А Сериянинг бир мавсумида иштирок эта олмаган, холос. Ўз тарихида 3 марта Италия чемпионлиги, 9 марта Италия Кубоги, 2 марта Италия Суперкубоги соҳибига айланган.

21-ўрин: Антонио Кассано

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 52
  • Ўйинлар сони: 161
  • «Рома»даги фаолияти: 2001—2006

Италиялик ҳужумчи 2001—2006 йиллар мобайнида «Рома»да ўйнаган. Бу вақт оралиғида Кассано римликлар сафида 161 ўйинда майдонга тушиб, 52 та гол уришга муваффақ бўлган. Яхши ўйин кўрсатиши билан биргаликда футболчи раҳбарият ва мураббий билан низолашиб қолади. Шу сабабли «Рома»да ёрқин фаолият олиб боролмайди.

20-ўрин: Карло Галли

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 54
  • Ўйинлар сони: 125
  • «Рома»даги фаолияти: 1951—1956

Ҳужум чизиғида ўйнайдиган италиялик футболчи «Рома», «Милан» клублари ва Италия терма жамоасидаги ҳаракатлари билан машҳур. «Рома» сафида ўтказган 5 мавсуми давомида нафақат асосий таркиб футболчиси, балки жамоанинг энг яхши тўпурари ҳам эди. Унинг статистикаси бир ўйинга ўртача 0,43 та гол тўғри келади. Италия терма жамоасида ҳам 13 та ўйинда иштирок этиб, 5 та гол урган.

19-ўрин: Ружеро Риццителли

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 55
  • Ўйинлар сони: 211
  • «Рома»даги фаолияти: 1988—1994

Италиялик ҳужумчи энг ёрқин йилларини «Рома»да ўтказган. «Бўрилар» сафидаги 6 мавсуми давомида Италия Кубогини қўлга киритишга муваффақ бўлган. Ружеро 211 ўйинда рақиблар дарвозасини 55 марта ишғол қилган.

18-ўрин: Мансини

Фото: Getty Images

  • Фуқаролиги: Бразилия
  • Позиция: ҳужумкор ярим ҳимоячи
  • Голлар сони: 59
  • Ўйинлар сони: 222
  • «Рома»даги фаолияти: 2003—2008

Бразилиялик футболчи 2003 йилдан то 2008 йилгача «Рома» шарафини ҳимоя қилган. Римлик мухлислар Мансинини чиройли ва энг асосийси муҳим голлари билан эслаб қолган. Ярим ҳимоячи 222 ўйинда 59 та гол урган.

17-ўрин: Артуро Чини Лудуэна

Фото: Storia della Roma

  • Фуқаролиги: Аргентина
  • Позиция: ҳужумчи
  • Голлар сони: 62
  • Ўйинлар сони: 180
  • «Рома»даги фаолияти: 1927—1934

Аргентиналик футболчи 1927 йилдан 1934 йилгача «бўрилар» шарафини ҳимоя қилган. Айтиб ўтиш жоиз, Артуро Италия фуқаролигига ҳам эга бўлган ва Италия терма жамоасида ўйнаган. Римликлар сафида 180 баҳсда иштирок этиб, 62 та гол урган. Мухлислар ва журналистлар уни «адвокат» деб чақирарди.

16-ўрин: Даниэле де Росси

Фото: Getty Images

  • Фуқаролиги: Италия
  • Позиция: таянч ярим ҳимоячи
  • Голлар сони: 63
  • Ўйинлар сони: 616
  • «Рома»даги фаолияти: 2002—2019

Де Росси — «Рома»га содиқ футболчилардан бири. А Сериянинг энг яхши ярим ҳимоячиси деб тан олинган. 616 ўйинда Даниэле 63 та гол урган. Ундан ташқари Италия терма жамоаси билан 2006 йилда Жаҳон Чемпионати ғолиби бўлган.

15-ўрин: Мирко Вучинич

Фото: Getty Images

  • Фуқаролиги: Черногория
  • Позиция: ҳужумчи
  • Голлар сони: 64
  • Ўйинлар сони: 204
  • «Рома»даги фаолияти: 2006—2011

Черногориялик футболчи 2006 йилда «Рома» сафига келиб қўшилган. 2011 йилга қадар Мирко 204 ўйинда иштирок этиб, 64 та гол урган. «Бўрилар» сафида икки марта Италия Кубоги ва бир марта Италия Суперкубогини қўлга киритган.

14-ўрин: Руди Фёллер

Фото: Getty Images

  • Фуқаролиги: Германия
  • Позиция: ҳужумчи
  • Голлар сони: 68
  • Ўйинлар сони: 197
  • «Рома»даги фаолияти: 1987—1992

Германиялик ҳужумчи фаолиятининг асосий қисмини «Байер» ва «Рома» жамоаларида ўтказган. Фёллер римликлар сафида 197 ўйинда 68 та гол урган. Германия терма жамоаси билан эса мундиал олтин ва кумуш медалларини қўлга киритган.

13-ўрин: Агостино ди Бартоломеи

Фото: Getty Images

  • Фуқаролиги: Италия
  • Позиция: ҳимоячи, ярим ҳимоячи
  • Голлар сони: 69
  • Ўйинлар сони: 310
  • «Рома»даги фаолияти: 1973—1984

Италиялик футболчи «Рома» академияси тарбияланувчиси ҳисобланади. 4 йил жамоа сардори сифатида майдонга чиққан ва бу вақт оралиғида «Рома» Скудеттони қўлга киритган. Италия чемпионлиги римликларга Европа Чемпионлар Кубогида иштирок этиш ҳуқуқини берди ва мусобақадаги дебютидаёқ жамоа финалга қадар етиб борди. 1984 йил 30 майда бўлиб ўтган финалда Агостино сардор сифатида жамоани майдонга олиб тушди. Ди Бартоломеи жамоасини пенальтилар сериясига қадар етаклаб борди. Биринчи пенальтини аниқ амалга оширди. Афсуски, римликлардан омад юз ўгирди. Лекин ўйиндан сўнг ди Бартоломеи финалдаги мағлубият айбдори бўлиб қолди. Барча уни айбларди. Орадан 10 йил ўтиб, футболчи ўз жонига қасд қилади. Бунга ўша мағлубият сабабчи қилиб кўрсатилади.

12-ўрин: Чезаре Аугусто Фазанелли

Фото: Ilromanista

  • Фуқаролиги: Италия
  • Позиция: ярим ҳимоячи
  • Голлар сони: 72
  • Ўйинлар сони: 184
  • «Рома»даги фаолияти: 1927—1933

Ўтган асрнинг 20 йилларида «бўрилар» сафига келиб қўшилган футболчи 184 ўйинда рақиблар дарвозасини 72 марта ишғол қилган. «Рома» ва «Фиорентина» сафида майдонга тушиб, умумий ҳисобда А Серияда 7 мавсум ўйнаган.

11-ўрин: Жузеппе Жаннини

Фото: Getty Images

  • Фуқаролиги: Италия
  • Позиция: ярим ҳимоячи
  • Голлар сони: 75
  • Ўйинлар сони: 437
  • «Рома»даги фаолияти: 1981—1996

15 йил давомида «Рома» шарафини ҳимоя қилган футболчи 437 та ўйинда майдонга тушган. «Бўрилар» академияси тарбияланувчиси жамоа президенти Франко Сенси билан келиша олмай Римни тарк этишга қарор қилади. Хайрлашув ўйинида журналистларга Жаннини: «Мана шу лаҳзалар учун бутун ҳаётимни «Рома»га бағишладим, шундай қилганимдан фахрланаман», — деганди.

10-ўрин: Дино да Коста

Фото: Comunità Italianа

  • Фуқаролиги: Бразилия, Италия
  • Позиция: ярим ҳимоячи, ҳужумчи
  • Голлар сони: 79
  • Ўйинлар сони: 163
  • «Рома»даги фаолияти: 1955—1960

Келиб чиқиши бразилиялик бўлган да Коста Италияга келганидан сўнг мамлакат фуқаролигини олди ва Италия терма жамоасида битта ўйинда иштирок этди. «Рома» сафида муваффақиятли фаолият олиб борган. «Рома» тарихидаги энг яхши ҳужумчилардан бири. Римдаги 5 йилида Дино 163 ўйинда иштирок этиб, 79 та гол урган.

9-ўрин: Марко Делвеккио

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 81
  • Ўйинлар сони: 300
  • «Рома»даги фаолияти: 1995—2005

Марко «Рома»даги фаолияти давомида Италия чемпионлиги ва Италия Суперкубогини қўлга киритган. 2002 йилдан 2013 йилгача Рим дербисида энг яхши тўпурар ҳисобланган. У дербида 9 та гол урганди. «Бўрилар» сафидаги 300 ўйинида 81 та голни ўз ҳисобига ёздириб қўйган.

8-ўрин: Абел Балбо

Фото: Getty Images

  • Фуқаролиги: Аргентина
  • Позиция: ҳужумчи
  • Голлар сони: 87
  • Ўйинлар сони: 182
  • «Рома»даги фаолияти: 1993—1998, 2000—2002

Абел Балбо «Рома» сафида Даниэль Фонсека билан тандем ҳосил қилиб ҳужум чизиғида ўйнади. Ундан сўнг Тотти билан жуфтликда ўйнади. Балбо бир мавсумда 10 тадан кам гол урмасди. 2000 йилда Римга қайтиб келди. Аммо бу сафар аввалгидек самарадор ўйин намойиш эта олмади.

7-ўрин: Эдин Жеко

Фото: Getty Images

  • Фуқаролиги: Босния ва Герцеговина
  • Позиция: ҳужумчи
  • Голлар сони: 91
  • Ўйинлар сони: 184
  • «Рома»даги фаолияти: 2015 йилдан буён

Босния ва Герцеговина терма жамоаси сардори бўлган Жеко 2015 йилдан буён «Рома»да тўп суради. Бу вақт оралиғида ҳужумчи 184 та ўйинда иштирок этиб, 91 та гол урган. Жеко ҳали-ҳамон римликлар шарафини ҳимоя қилади ва бу рақамлар янада кўпайиш эҳтимоли юқори.

6-ўрин: Винченцо Монтелла

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 102
  • Ўйинлар сони: 258
  • «Рома»даги фаолияти: 1999—2009

Монтелла Римда 10 мавсум ўтказган. Ҳужумчи «Сампдория»дан «Рома»га келиб қўшилган ва дебют мавсумидаёқ рақиблар дарвозасига 18 та гол уришга муваффақ бўлган. Франческо Тотти ва Марко Делвеккио билан бирга ҳужумда қойилмақом учлик ҳосил қилган. Бу «Рома» тарихидаги энг яхши ҳужум учлигидан бирига айланган. Винченцо 258 ўйинда 102 та гол урган.

5-ўрин: Педро Манфредини

Фото: La Gazzetta dello Sport

  • Фуқаролиги: Аргентина
  • Позиция: ҳужумчи
  • Голлар сони: 104
  • Ўйинлар сони: 164
  • «Рома»даги фаолияти: 1959—1965

Педро «Рома» легионерлари ичида энг яхши тўпурар ҳисобланади. Аргентиналик ҳужумчи 164 та ўйинда иштирок этиб, рақиблар дарвозасини 104 марта ишғол қилган. Манфредини «бўрилар» билан Италия Кубогини қўлга киритган.

4-ўрин: Родолфо Волк

Фото: La Gazzetta dello Sport

  • Фуқаролиги: Италия
  • Позиция: ҳужумчи
  • Голлар сони: 106
  • Ўйинлар сони: 161
  • «Рома»даги фаолияти: 1928—1933

Италиялик ҳужумчи «Рома» тарихидаги энг муҳим футболчилардан бири. Айнан у «Капитолий дербиси»да биринчи голни урган. Волк 161 ўйинда 106 марта рақиблар дарвозасини ишғол қилган.

3-ўрин: Амедео Амадеи

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 111
  • Ўйинлар сони: 234
  • «Рома»даги фаолияти: 1936—1948

Италиялик ҳужумчи «Рома» шарафини 12 йил давомида ҳимоя қилиб, жамоа тарихидаги энг яхши учинчи тўпурарга айланган. Амедео «Рома» академияси тарбияланувчиси ҳисобланади. Ҳужумчи биринчи голини 15 ёшида урган. 1942 йилдан то 1948 йилгача «бўрилар» сардори бўлган.

2-ўрин: Роберто Пруццо

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 138
  • Ўйинлар сони: 315
  • «Рома»даги фаолияти: 1978—1988

Роберто уч марта Италия чемпионатининг энг яхши тўпурарига айланган. «Рома» тарихидаги энг яхши иккинчи тўпурар. 10 йил давомида «Рома» сафида майдонга тушган ҳужумчи 315 ўйинда 138 та гол урган.

1-ўрин: Франческо Тотти

Фото: Getty Images

  • Фуқаролиги: Италия
  • Позиция: ҳужумчи
  • Голлар сони: 307
  • Ўйинлар сони: 786
  • «Рома»даги фаолияти: 1992—2017

Бутун фаолиятини «Рома»да ўтказган Тотти ҳужумчи ва ярим ҳимоячи сифатида фаолият олиб борган. Жамоа тарихидаги энг яхши тўпурар ва энг кўп ўйин ўтказган футболчи. Чин маънодаги афсона. Франческо Тотти «бўрилар» сафида 786 ўйинда иштирок этиб, 307 та голни ўз ҳисобига ёздириб қўйган.