Актёр Кит Харингтон SiriusXM радиостанциясига берган интервьюсида «Тахтлар ўйини» сериалини суратга олиш ишлари якунлангач, руҳий соғлиғини қайта тиклаш мақсадида бир йиллик таътилга чиқишга мажбур бўлганини маълум қилди, деб хабар беради Esquire.

Фото: Legion Media

«‘Тахтлар ўйини’дан кейин, шунингдек, суратга олиш ишларининг охирида руҳий саломатлигимда айрим муаммолар кузатилди. Ўйлайманки, улар шоунинг характери ва йиллар давомида шуғулланган нарсамга тўғридан-тўғри боғлиқ», — дейди Харингтон.

Актёрнинг сўзларига кўра, лойиҳадаги суратга олиш ишларидан кейин у бир йил давомида ишлашни хоҳламаган ва «диққатини ўзига қаратишга» уринган. «Айнан шундай йўл тутганимдан хурсандман», — дея қўшимча қилади Харингтон. Шу билан бирга, актёр ишга қайтишни хоҳлаган вақтида бутун дунёда коронавирус пандемияси бошланган.

Эслатиб ўтамиз, 2018 йилнинг июнида HBO телеканалининг «Тахтлар ўйини» сериалида ижро этган роллари орқали бутун дунёга машҳур бўлган актёр Кит Харингтон ва актриса Роуз Лесли турмуш қурган эди. 2019 йилда эса Кит Харрингтон шоу финалига чиққанидан сўнг реабилитация шифохонасига ётган эди.