Kit Xarington “Taxtlar o‘yini”dan keyin ruhiy sog‘lig‘ini tiklash uchun bir yillik ta’tilga chiqqanini so‘zlab berdi

Aktyor Kit Xarington SiriusXM radiostansiyasiga bergan intervyusida “Taxtlar o‘yini” serialini suratga olish ishlari yakunlangach, ruhiy sog‘lig‘ini qayta tiklash maqsadida bir yillik ta’tilga chiqishga majbur bo‘lganini ma’lum qildi, deb xabar beradi Esquire.

“‘Taxtlar o‘yini’dan keyin, shuningdek, suratga olish ishlarining oxirida ruhiy salomatligimda ayrim muammolar kuzatildi. O‘ylaymanki, ular shouning xarakteri va yillar davomida shug‘ullangan narsamga to‘g‘ridan to‘g‘ri bog‘liq”, — deydi Xarington.

Aktyorning so‘zlariga ko‘ra, loyihadagi suratga olish ishlaridan keyin u bir yil davomida ishlashni xohlamagan va “diqqatini o‘ziga qaratishga” uringan. “Aynan shunday yo‘l tutganimdan xursandman”, — deya qo‘shimcha qiladi Xarington. Shu bilan birga, aktyor ishga qaytishni xohlagan vaqtida butun dunyoda koronavirus pandemiyasi boshlangan.

Eslatib o‘tamiz, 2018-yilning iyunida HBO telekanalining “Taxtlar o‘yini” serialida ijro etgan rollari orqali butun dunyoga mashhur bo‘lgan aktyor Kit Xarington va aktrisa Rouz Lesli turmush qurgan edi. 2019-yilda esa Kit Xarrington shou finaliga chiqqanidan so‘ng reabilitatsiya shifoxonasiga yotgan edi.