Жонс Ҳопкинс университети маълумотларига кўра, дунёда 198 291 544 киши COVID-19 билан касалланган, шуларнинг 4 224 015 нафари вафот этган. Касалланиш ҳолатларининг кўплиги бўйича АҚШ (35 миллион), Ҳиндистон (31,6 миллион), Бразилия (19,9 миллион), Франция (6,2 миллион) ва Россия (6,2 миллион) энг олдинда бормоқда.

Фото: EPA

Хитой ҳукумати ҳозирча COVID-19 тарқалишини тўхтатишга муваффақ бўлмаётганини маълум қилди.

Ҳукумат кўрган чораларга қарамасдан, Хитой ичида COVID-19 билан касалланиш ҳолатлари ўтган бир кеча-кундузда 55 тага кўпайди. Ундан олдинги куни (31 июль) 53 та шундай ҳолат қайд этилган эди.

Якшанба куни (1 август) Хитойда касалланганлар сони жами 98 кишига ошди, уларнинг 43 нафари чет элдан кириб келган. Мамлакат ичида вирусни юқтириш ҳолатлари Цзянсу, Хунань, Хубэй, Шаньдун, Хэнань, Хайнань, Юньнань провинцияларида ва Пекинда қайд этилди. Касалланиш ҳолатларининг ўсишини экспертлар дельта штамм билан боғламоқда.

Мамлакат ичида инфекция тарқалиши бўйича биринчи ўринда Жуйли (Юньнань провинцияси), иккинчи ўринда эса Нанкин (Цзянсу провинцияси) шаҳарлари бормоқда. Жуйлида вирус июль ойида қўшни Мьянмадан ўтган бўлса, Нанкинда эса чет элдан етиб келган авиалайнерларни тозалаш билан шуғулланган аэропорт ходимлари вирус тарқатувчига айланди.

Аҳолиси 9,3 миллиондан ортиқ бўлган Нанкин ҳукумати юз минглаб одамларни яккаланиш режимига жойлаштирди. Шунингдек, у ерда миллионлаб одамлар коронавирус тестидан ўтказилади. Энди Нанкинни ҳамда Чжанцзяцзе (Хунань провинцияси)ни тарк этган шахсларни текшириб боришга уринишмоқда. Айни пайтда ҳукумат Чжанцзяцзеда яшайдиган 1,5 миллион аҳолининг барчаси учун яккаланиш режимини жорий қилиб, маҳаллий сайёҳлик нуқталарини ёпиб қўйди.

Эстония олимлари коронавирусга қарши спрей ишлаб чиқди, у энг кўп хавотир уйғотувчи штаммларнинг барчасидан ҳимоя қилади.

Ген инженерияси билан шуғулланувчи Icosagent компанияси илмий директори Март Устав маълум қилишича, лаборатория тадқиқотлари бурунга сепиладиган дори, ЖССТ фикрича, энг кўп хавотир уйғотадиган штаммларнинг барчасидан, шу жумладан, ҳозирда Эстонияда тарқалаётган дельта штаммдан ҳам ҳимоя қилади.

«Биз жамоамиз билан вирусдаги ўзгаришларни доимий равишда кузатиб бориб, BioBlock спрейининг ҳали кенг тарқалиб улгурмаган штаммларни нейтраллаштириш қобилиятини синамоқдамиз», — деди Устав.

Жаҳон соғлиқни сақлаш ташкилоти (ЖССТ)нинг Фавқулодда ҳолатлар қўмитаси дунё ҳамжамиятини 2022 йил ўрталаригача аҳолининг 60 фоизини эмлашга чақирди.

ЖССТ вакиллари эслатишича, COVAX вакциналарни тақсимлаш механизми орқали атиги 90 миллион доза дори ўтган, бутун дунё бўйлаб эса 3 миллиард доза вакцина тарқалган.

ЖССТ ташкилотга аъзо мамлакатларга 2021 йил сентябргача дунё аҳолисининг камида 10 фоизини, декабргача  — 40 фоизини, 2022 йил ўрталаригача эса 60 фоизини эмлашга даъват этди. «Аҳолининг заиф гуруҳларини COVID-19 вариантлари пайдо бўлиши ва тарқалишидан ҳимоя қилиш учун глобал бирдамликни кучайтириш талаб этилади», — дейилади ЖССТ хабарида.

Ушбу мақсадга эришиш учун тўрт ой ичида даромад даражаси паст ва ўртача бўлган мамлакатларда яна 250 миллион киши вакцинациядан ўтиши керак.

«Бу пандемия юқори даражада юқумли вирус келтириб чиқарди, аммо тақсимот, тенгсизлик ҳамда келажакка сармоя киритишга тайёр бўлмаслик уни бир неча маротаба кучайтирди. Шунинг учун биз жамиятимизнинг камчиликларини бартараф қилишимиз керак», — дейилади хабарда.

Берлинда коронавирус чекловларига қарши намойишларда 600 га яқин одам қўлга олинди.

1 август куни шаҳарда шу мавзуга бағишланган 13 та норозилик акцияси бўлиб ўтди. Бранденбург дарвозаси яқинидаги майдонга сув замбараклари олиб келинди. У ерда Querdenken 711 ҳаракатининг юзлаб тарафдорлари тўпланди. Намойишга пандемия чоғида ижтимоий масофа қоидаларига риоя қилиш иложсизлиги туфайли шаҳар ҳукумати томонидан розилик берилмаган.

Дастлаб полициячилар акция ўтказилишининг олдини олишни режалаштирган эди, аммо бунга муваффақ бўлмади.