Ўзбекистон истеъмол бозоридаги товарлар ва хизматлар июль ойида ҳам ўртача 0,2 фоизга арзонлашди

Давлат статистика қўмитаси июль ойида анъанавий равишда дефляцияни қайд этди, деб хабар бермоқда Spot қўмита маълумотларига таяниб.

Маълум қилинишча, июль ойида товарлар ва хизматлар ўртача 0,2 фоизга арзонлашди. 2021 йил бошидан эса улар 4,2 фоизга қимматлади.

Ушбу ҳолат, асосан, мавсумий омил ҳамда мева ва сабзавотлар нархи арзонлашгани билан тавсифланади. Ундан аввалги йилларда ҳам шундай бўлган: 2020- йилнинг июль ойида товарлар ва хизматлар ой давомида ўртача 0,3 фоизга, 2019- йилда эса 0,4 фоизга арзонлашган.

Озиқ-овқат маҳсулотлари 0,9 фоизга арзонлади, ноозиқ-овқат маҳсулотлар 0,5 фоизга, хизматлар эса 0,2 фоизга қимматлади. Марказий банк 2021 йилда инфляция 10 фоиз атрофида бўлишини прогноз қилганди. Ҳозирча бу тахмин ўзини оқламоқда.

Эслатиб ўтамиз, июнь ойида ҳам Ўзбекистон истеъмол бозоридаги товарлар ва хизматлар ўртача 0,2 фоизга арзонлашганди.