Скарлетт Йоханссон «Қора бева» кинотеатрлар ва Disney стриминг сервисида бир вақтнинг ўзида чиққани учун студияни судга берди. Оқибатда актрисанинг гонорари камайиб кетган

«Қора бева» фильмида бош ролни ижро этган актриса Скарлетт Йоханссон Disney киностудиясини судга берди. У компанияни шартномани бузишда айбламоқда, бироқ студия вакиллари буни рад этяпти, деб хабар беради Esquire.

Картина премьераси бир неча бор кўчирилган ва охир-оқибат у Disney+ стриминг сервиси ва кинотеатларда бир вақтнинг ўзида чиқди. Бу Йоханссоннинг гонорарига боғлиқ бўлган касса йиғимларига салбий таъсир кўрсатган.

Актрисанинг сўзларига кўра, Marvel компаниясига тегишли бўлган Disney «Қора бева» аввал кинотеатларда намойиш этилишини кафолатлаган. Келишувнинг бузилиши оқибатида актриса 50 миллион доллар йўқотган.

Аммо Disney’дагиларнинг маълум қилишича, Йоханссоннинг даъвосида «ҳеч қандай асос йўқ». «Айниқса, даъвода бутун дунё бўйлаб таъсир кўрсатган коронавирус пандемиясининг қўринчли оқибатлари эътиборга олинмаган», — дейилади компания баёнотида. Таъкидланишича, студия «Йоханссон билан тузилган шартноманинг барча шартларига риоя қилган», Disney+ да «Қора бева»нинг узатилиши натижасида эса актриса «олган 20 миллион доллардан ташқари каттагина компенсация» олиши мумкин.

«Қора бева»нинг премьераси даставвал 2020 йилнинг майида бўлиб ўтиши керак эди, аммо коронавирус пандемияси сабаб у бир неча бор кўчирилган. Натижада фильм 2021 йилнинг 9 июлида катта экранларга чиқди.

Дастлабки дам олиш кунлари давомида «Қора бева» пандемия давридаги касса йиғимлари бўйича рекорд ўрнатган — 218 миллион доллар. Иккинчи ҳафтада эса йиғимлар бир неча мартага тушиб кетган. Прокатчилар буни фильмнинг Disney+ стриминг сервисида ҳам тақдим этилгани билан боғламоқда.

Аввалроқ «Қора бева» ва Xiaomi Mi 11 бир-бирини реклама қилишни бошлагани тўғрисида хабар берилганди.