“Qora beva” filmida bosh rolni ijro etgan aktrisa Skarlett Yoxansson Disney kinostudiyasini sudga berdi. U kompaniyani shartnomani buzishda ayblamoqda, biroq studiya vakillari buni rad etyapti, deb xabar beradi Esquire.
Kartina premyerasi bir necha bor ko‘chirilgan va oxir-oqibat u Disney+ striming servisi va kinoteatlarda bir vaqtning o‘zida chiqdi. Bu Yoxanssonning gonorariga bog‘liq bo‘lgan kassa yig‘imlariga salbiy ta’sir ko‘rsatgan.
Aktrisaning so‘zlariga ko‘ra, Marvel kompaniyasiga tegishli bo‘lgan Disney “Qora beva” avval kinoteatlarda namoyish etilishini kafolatlagan. Kelishuvning buzilishi oqibatida aktrisa 50 million dollar yo‘qotgan.
Ammo Disney’dagilarning ma’lum qilishicha, Yoxanssonning da’vosida “hech qanday asos yo‘q”. “Ayniqsa, da’voda butun dunyo bo‘ylab ta’sir ko‘rsatgan koronavirus pandemiyasining qo‘rinchli oqibatlari e’tiborga olinmagan”, — deyiladi kompaniya bayonotida. Ta’kidlanishicha, studiya “Yoxansson bilan tuzilgan shartnomaning barcha shartlariga rioya qilgan”, Disney+ da “Qora beva”ning uzatilishi natijasida esa aktrisa “olgan 20 million dollardan tashqari kattagina kompensatsiya” olishi mumkin.
“Qora beva”ning premyerasi dastavval 2020-yilning mayida bo‘lib o‘tishi kerak edi, ammo koronavirus pandemiyasi sabab u bir necha bor ko‘chirilgan. Natijada film 2021-yilning 9-iyulida katta ekranlarga chiqdi.
Dastlabki dam olish kunlari davomida “Qora beva” pandemiya davridagi kassa yig‘imlari bo‘yicha rekord o‘rnatgan — 218 million dollar. Ikkinchi haftada esa yig‘imlar bir necha martaga tushib ketgan. Prokatchilar buni filmning Disney+ striming servisida ham taqdim etilgani bilan bog‘lamoqda.
Avvalroq “Qora beva” va Xiaomi Mi 11 bir-birini reklama qilishni boshlagani to‘g‘risida xabar berilgandi.
Izoh (0)