Сурхондарё вилояти Сариосиё туманида вояга етмаган йигит бошқарувидаги «Волга» дарахтга урилиши оқибатида 14 ёшли йўловчи ҳалок бўлди. Бу ҳақда вилоят ИИБ ЙҲХБ ахборот хизмати хабар берди.
Маълум бўлишича, кўнгилсиз ҳодиса 27 июль куни соат 03:45 ларда туманнинг «Феруз» маҳалласидан ўтувчи автомобиль йўлида содир бўлган. Ҳайдовчилик гувоҳномасига эга бўлмаган А.Ж. исмли йигит машинани юқори тезликда бошқариб кетаётиб, йўл нотекислиги сабаб бошқарувни йўқотган ва иккита дарахтга урилган.
Мазкур йўл-транспорт ҳодисаси оқибатида машина салонида бўлган 14 ёшли йўловчи воқеа жойида ҳалок бўлган.
Хабарда айтилишича, йигит отасига тегишли машинани унинг рухсатисиз миниб чиқиб кетган. «Машина бошқаришини билардим, лекин ўзим ўргатмаганман. Олдиндан қизиқарди, дўстларининг машиналарини яширинча ҳайдаб ўрганган», — дейди ҳайдовчининг отаси.
Таъкидлаш керакки, Сурхондарёда ҳайдовчилик гувоҳномасисиз автомобиль бошқариш ҳолатлари биринчи бор қайд этилмаяпти. Хусусан, аввалроқ Шерободда ҳайдовчилик гувоҳномаси бўлмаган йигит бошқарувидаги «Жигули» 11 ёшли пиёдани уриб юборгани ва жабрланувчи шифохонада вафот этгани, Бойсунда ҳайдовчилик гувоҳномаси бўлмаган йигит бошқарувидаги Nexia пастликка тушиб кетиши оқибатида 17 ёшли қиз ҳалок бўлгани тўғрисида хабар берилганди.
Изоҳ (0)