Ижтимоий тармоқларда «Норин дарёсидан топилган жасаднинг ўлимига калтакланиши сабабми ёки 58 дақиқада етиб келган тез ёрдам машинасими?» изоҳи билан видео тарқалган. Видео юзасидан Наманган вилояти ИИБ расмий муносабат билдирди.
Қайд этилишича, 2021 йилнинг 27 июль куни соат 05:50 ларда 102 қисқа рақамига Учқўрғон туманида яшовчи Б.Н. қўнғироқ қилиб, жияни, шу туманда яшовчи 1992 йилда туғилган А.С. номаълум шахслар томонидан қасддан ўлдирилиб, тумандаги «Эшонтўпи» МФЙ ҳудудидан оқиб ўтувчи Норин дарёси қирғоғига ташлаб кетилгани ва унинг бошқарувида бўлган Spark русумли автомашинаси олиб қочиб кетилганини маълум қилиб, номаълум шахсларни топишда ҳамда уларга нисбатан қонуний чора кўришда ёрдам сўраган.
Мазкур ҳолат юзасидан вилоят прокуратураси ўта оғир жиноятларни тергов қилиш бўлими томонидан 2021 йил 27 июль куни Жиноят кодексининг 97-моддаси 2-қисми «и» (тамагирлик ниятида қасддан одам ўлдириш) банди билан жиноят иши қўзғатилиб, тергов ҳаракатлари олиб борилмоқда.
Олиб борилган тезкор-қидирув тадбирлари давомида 2021 йил 26 июль куни, тахминан, соат 18:30 ларда Учқўрғон туманида яшовчи 1962 йилда туғилган Н.М. турмуш ўртоғи Н.Г. билан биргаликда томорқа ерига экилган мош ва шоли экинларидан хабар олиб келиш учун кетаётган вақтида Норин дарёси дамбасида оқ рангли Spark русумли автомашинанинг чап олди эшиги олдида, тахминан, 20—25 ёшлардаги номаълум шахс турганини, дарё бўйига эса икки нафар шахс тушиб кетганлигини кўргани аниқланган.
Шунингдек, тезкор қидирув тадбирлари натижасида шу куни соат 22:36 да жабрланувчи А.С. бошқарувида бўлган Spark русумли автомашинанинг олд чап томон балони ҳаво қўйиб юборганлиги сабабли 2 нафар номаълум шахс Мингбулоқ тумани, «Гулбоғ» МФЙ ҳудудида жойлашган дўкон олдида қолдириб, ўзлари номаълум томонга қараб кетгани шу ердаги мавжуд кузатув камерасига қайд этилгани аниқланган.
Автомашинани кўздан кечириш давомида 18 дона яроқли қўл бармоқ изи аниқланди. Кузатув камераларидан олинган тасвирлар ёрдамида ушбу жиноятни содир этган шахс Учқўрғон туманида, унинг шериги эса Андижон вилоятида яшаши маълум бўлди. Гумондорлар Тошкент шаҳар ҳудудида ушланган.
Бундан аввал Андижонда шаръий никоҳдаги эри бошқага уйланаётгани учун уни ўлдирган аёл 10 йилга қамалгани, Жиззахда маст ҳолатда танишини пичоқлаб ўлдирган эркакка жиноят иши қўзғатилгани ҳамда Қашқадарёда руҳий касал ўғил 74 ёшли онасини болта билан ўлдиргани ҳақида хабар берилганди.
