Витамин, клетчатка ва кальцийга бой бўлган карамда яна қандай фойдали моддалар мужассам?
Карамдошлар оиласига мансуб кейл, пекин карами, шолғомкарам ва бошқалар калорияси камлиги, саломатлик учун муҳим саналган клетчатка, фитонутриент ва минералларга бой экани билан ўзига хосдир.
Бир порция хом карамда (200 граммга яқин) қуйидагилар мужассам бўлади:
- 33 калория;
- 1 грамм ёғ;
- 0 миллиграмм холестерин;
- 25 миллиграмм натрий;
- 329 миллиграмм калий;
- 6 грамм углевод;
- 3 грамм оқсил;
- 2,5 грамм клетчатка;
- А витаминининг 133 фоиз кунлик меъёри;
- C витаминининг 134 фоиз кунлик меъёри;
- кальцийнинг 10 фоиз кунлик меъёри;
- B6 витамининг 10 фоиз кунлик меъёри;
- магнийнинг 7 фоиз кунлик меъёри.
Карамдаги микроэлемент, антиоксидант ва витаминлар қуйидагича фойда беради:
Сурункали касалликларнинг келиб чиқиш хавфини камайтиради.
Кўриш қобилиятини сақлашга ёрдам беради: бир порция карамда лютеин каротиноиди, зеаксантин ва бета-каротиннинг кунлик меъёридан кўпроғи мужассам бўлади. Ушбу моддалар кўз тўқималарини ультрабинафша нурларининг зарарли таъсиридан ҳимоя қилади ва катарактанинг келиб чиқиш хавфини камайтиради.
Қон босимини пасайтиришга ёрдам беради: карам, шунингдек, бошқа сабзавотлар таркибидаги калий, кальций ва магний, натрийнинг таъсирини нейтраллаштиради.
Суякларни мустаҳкамлайди: Карамда суякларнинг мустаҳкамлигига жавоб берадиган кальцийнинг 10 фоиз кунлик нормаси бўлади.
Карамда қанча клетчатка бўлади?
Карам бир қарашда унча кўп бўлмаган, яъни 2 грамм клетчаткани ўз ичига олади. Аммо тайёрланган салат ёки пиширилган ҳолида истеъмол қилинса, 8—10 грамм клетчатка билан тўйиниш мумкин.
Карам фойдалими ёки исмалоқ?
Исмалоқда мушаклар тўқимасининг саломатлиги учун муҳим бўлган магний, темир ва фолий кислотаси бисёр бўлади. Карам эса каротиноиддан ташқари кальций, ўсимлик оқсиллари ҳамда C витаминининг кони. Шундай экан уларни қўшиб, салат тайёрлаш орқали витаминларга тўйиниш мумкин.
Карамни хомлигича истеъмол қилиш керакми?
Хоҳишга қараб истеъмол қилиш мумкин. Аввалроқ ўтказилган тадқиқотда қайнатилган карамнинг фойдаси хоминикидан кам эмаслиги аниқланган. Рационда қанча кўп бўладиган бўлса, шунча яхши. Қандай ҳолда истеъмол қилиш эса ўзингизга боғлиқ. Агар таъми тахир туйиладиган бўлса, авокадо ёки бошқа фойдали ёғга солиб, қовурсангиз бўлади. Фақат клетчатка ва фойдали моддалардан холи бўлгани сабаб карам шарбатини истеъмол қилиш тавсия қилинмайди.
Карамдан тайёрланган чипс фойдали бўладими?
Уйдаги карамдан тайёрланган чипсда калория картошкали вариантдан камроқ бўлади. Дўкондан харид қилганда эса таркиби билан танишиб чиқиш керак. Унга кам ва фойдали ёғ, туз, мурч, бироз зираворлар қўшилган бўлиши керак.
Карам Атроф-муҳитни муҳофаза қилиш бўйича ишчи гуруҳнинг (EWG) 2019 йилдаги пестицидлари миқдори кўп бўлган сабзавотлар рўйхатидан ўрин олган. Пестицидларнинг маҳсулот орқали ҳақиқий таъсирини аниқлашнинг синалган усули йўқ. Текширувдан аввал ювиб тозаланган бўлса-да, қолдиқларни истеъмол қилишнинг хавфини баҳолаб бўлмайди. Аксарият тадқиқотларда карамни кўп миқдорда истеъмол қилишнинг зараридан кўра фойдаси кўплиги исботланган.
