Ўзбекистон ва Покистон етакчиларининг музокаралари якунлари бўйича 15 июль, пайшанба куни Кўксарой қароргоҳида ОАВ вакиллари учун брифинг ўтказилди. Бу ҳақда «Дарё» мухбири хабар бермоқда.
Покистон Бош вазири Имрон Хон келгусида икки давлат ўртасида ҳаво ва ерусти транспорти бўйича амалга ошириладиган режаларга тўхталди.
Фото: Президент матбуот хизмати
«Мамлакатларимиз ўртасидаги ўзаро боғлиқлик тўғрисида гапирар эканмиз, бу борада, албатта, иккита йўналиш жуда ҳам муҳимлигини таъкидлаш керак. Биринчиси, ҳаво орқали алоқаларни ўрнатиш. Биз бугун келишиб олдикки, бу йўналишда, аввало, йўловчилар қатнови сонини ошириш ва ҳаводаги карго юклар ташишни ҳам йўлга қўйишдир. Иккинчиси, ерусти транспорти орқали ўзаро иқтисодий алоқаларни ривожлантириш.
Покистон чегарасидан Ўзбекистон ҳудудига қадар бир синов-тажриба сифатида автотранспорт йўлга чиққан ва икки кун ичида Ўзбекистонга кириб келишга муваффақ бўлган. Бу ҳам мазкур йўналишда катта салоҳият мавжуд эканлигини билдиради», — деди Имрон Хон.
У Термиз—Мозори Шариф—Кобул—Пешовар темир йўли қурилиши масаласи бўйича ҳам ўз фикрларини айтди.
«Жаноб Шавкат Мирзиёев, сиз ўз ғоянгиз маҳсули бўлган Термиз—Мозори Шариф—Кобул—Пешовар темир йўли лойиҳасини илғор равишда тақдим этиб келяпсиз. Биз Покистонда сизнинг фикрларингизни ўрганиб, бунга ишондик ва ҳозирги кунда бу ғоя нақадар тўғри эканлигини англаб, катта иштиёқ билан буни амалга оширишни кутиб қолмоқдамиз. Чунки бу давлатларимиз ўртасидаги товарлар транспортига, уларни етказиб беришга жуда катта хизмат қилади. Сизни ишонтириб айтаманки, шахсан ўзим ва менинг ҳукуматим ушбу ғоя ортида турамиз ҳамда уни амалга оширишда сизга кўмакчи бўламиз», — деди Покистон бош вазири.
