O‘zbekiston va Pokiston yetakchilarining muzokaralari yakunlari bo‘yicha 15-iyul, payshanba kuni Ko‘ksaroy qarorgohida OAV vakillari uchun brifing o‘tkazildi. Bu haqda “Daryo” muxbiri xabar bermoqda.
Pokiston Bosh vaziri Imron Xon kelgusida ikki davlat o‘rtasida havo va yerusti transporti bo‘yicha amalga oshiriladigan rejalarga to‘xtaldi.
“Mamlakatlarimiz o‘rtasidagi o‘zaro bog‘liqlik to‘g‘risida gapirar ekanmiz, bu borada, albatta, ikkita yo‘nalish juda ham muhimligini ta’kidlash kerak. Birinchisi, havo orqali aloqalarni o‘rnatish. Biz bugun kelishib oldikki, bu yo‘nalishda, avvalo, yo‘lovchilar qatnovi sonini oshirish va havodagi kargo yuklar tashishni ham yo‘lga qo‘yishdir. Ikkinchisi, yerusti transporti orqali o‘zaro iqtisodiy aloqalarni rivojlantirish.
Pokiston chegarasidan O‘zbekiston hududiga qadar bir sinov-tajriba sifatida avtotransport yo‘lga chiqqan va ikki kun ichida O‘zbekistonga kirib kelishga muvaffaq bo‘lgan. Bu ham mazkur yo‘nalishda katta salohiyat mavjud ekanligini bildiradi”, — dedi Imron Xon.
U Termiz—Mozori Sharif—Kobul—Peshovar temiryo‘li qurilishi masalasi bo‘yicha ham o‘z fikrlarini aytdi.
“Janob Shavkat Mirziyoyev, siz o‘z g‘oyangiz mahsuli bo‘lgan Termiz—Mozori Sharif—Kobul—Peshovar temiryo‘li loyihasini ilg‘or ravishda taqdim etib kelyapsiz. Biz Pokistonda sizning fikrlaringizni o‘rganib, bunga ishondik va hozirgi kunda bu g‘oya naqadar to‘g‘ri ekanligini anglab, katta ishtiyoq bilan buni amalga oshirishni kutib qolmoqdamiz. Chunki bu davlatlarimiz o‘rtasidagi tovarlar transportiga, ularni yetkazib berishga juda katta xizmat qiladi. Sizni ishontirib aytamanki, shaxsan o‘zim va mening hukumatim ushbu g‘oya ortida turamiz hamda uni amalga oshirishda sizga ko‘makchi bo‘lamiz”, — dedi Pokiston bosh vaziri.
Mavzuga doir:
Izoh (0)