Бразилия президенти Жаир Болсонару деярли икки ҳафта давом этган сурункали ҳиқичоқ туфайли 14 июль куни касалхонага ётқизилди. Бу ҳақда президент матбуот хизматига таяниб, Associated Press хабар берди.

Фото: Getty Images

Аввалига Болсонару Бразилия шаҳридаги ҳарбий касалхонага ётқизилган. У ўзини яхши ҳис қилаётгани, шифохонада ёки уйда 24 соатдан 48 соатгача шифокорлар назорати остида бўлиши кераклиги айтилган.

Президент девонининг сўнгги хабарларига кўра, Жаир Болсонаруга шошилинч операция зарур бўлиши мумкин.

Болсонаруни 2018 йилда операция қилган жарроҳ Антонио Луис Маседо беморида ичак тугилиши бўлиши мумкин деб гумон қилмоқда.

Сиёсатчининг ўғли Флавионинг айтишича, президент илгари «ошқозонидан чиққан суюқлик нафас йўлини тўсиб қўйгани учун» интубация қилинган.

Шифокор, Болсонару қўшимча таҳлиллар топшириши керак, деган қарорга келди, шу асосда унинг шошилинч операцияга муҳтож ёки муҳтож эмаслиги аниқланади. Бунинг учун Болсонару Сан-Паулу касалхонасига кўчирилди.

66 ёшли Жаир Болсонару сўнгги ҳафталарда суҳбатлар чоғида бир неча бор қийинчиликларга дуч келаётганди. Унинг ўзи буни тинимсиз ҳиқичоқлар билан изоҳлади. 7 июль куни радиодаги чиқиши пайтида у тингловчилардан узр сўради ва беш кундан бери ҳиқичоқ тутаётганини айтди: «Мени кунига 24 соат ҳиқичоқ тутяпти». У буни баъзи дориларни қабул қилиш билан боғлади. 8 июль куни Facebook’даги трансляция давомида Болсонару яна ҳиқичоқ учун узр сўради.

АP ва Reuters таъкидлашича, 2018 йилда сайловолди кампанияси пайтида Жаир Болсонаруга пичоқ билан ҳужум қилинган. У ошқозонидан яраланган, ичакларига зарар етган. Шундан сўнг Болсонару бир нечта операцияларни бошдан ўтказган, уларнинг айримлари ҳужум билан боғлиқ бўлмаган.