Наманган вилоятининг Поп туманида Damas ҳайдовчиси MAN юк машинасига бориб урилиши оқибатида ҳалок бўлди. Бу ҳақда вилоят ИИБ матбуот хизмати хабар берди.
Воқеа 10 июль куни соат 00:20 ларда Тошкент—Ўш йўлининг 240-километрида юз берган. Фарғона вилоятида яшаган, 1974 йилда туғилган фуқаро Damas’ни водий—Тошкент йўналишида бошқариб бораётиб, ҳаракат хавфсизлигини таъминлай олмай, шу йўналишда ўзидан олдинда ҳаракатланиб кетаётган MAN русумли юк автомашинасини орқа қисмига бориб урилган.
Оқибатда Damas ҳайдовчиси оғир тан жароҳати олиб, воқеа жойида вафот этган.
Ҳолат бўйича Поп туман ИИБ ҳузуридаги ТБ томонидан терговга қадар текширув ҳаракатлари олиб борилмоқда.
Аввалроқ Наманганда Nexia-3 бетон тўсиққа урилиши оқибатида ҳайдовчи ҳалок бўлгани, Тошкентда Damas ва Matiz тўқнашиши оқибатида 2 ҳайдовчи тан жароҳати олгани, Қашқадарёнинг Муборак туманида Nexia ва юк машинаси иштирокида содир бўлган ЙТҲ оқибатида енгил машина ҳайдовчиси вафот этгани, Самарқандда Lada Largus ва Mercedes юк машинаси иштирокидаги ЙТҲ оқибатида 2 киши ҳалок бўлгани ҳақида хабар берилган эди.
Изоҳ (0)