«Nexia ҳайдовчиси пиёдалар йўлакчаси устида тўхтаб туриб, ҳаракатга халал берган». Ички ишлар вазирлиги Қаршидаги воқеани изоҳлади

«Дарё»да «Қаршидаги ‘рейд’да ҳайдовчининг тоби қочди. Воқеа гувоҳлари ҳайдовчи ЙПХ ходимлари томонидан калтакланганини айтмоқда», сарлавҳали хабар эълон қилинган эди, Ички ишлар вазирлиги вазиятни изоҳлади.

«Ҳолат юзасидан шуни маълум қиламизки, 2021 йилнинг 5 июль куни Қашқадарё вилояти ИИБ ЙПХ инспектори катта сержант О.Турсунов Қарши шаҳар А.Темур кўчасида, Қарши шаҳар Педагогика коллежи рўпарасидаги пиёдалар йўлакчаси устида тўхтаб турган ҳайдовчи О.О. бошқарувидаги Nexia русумли давлат рақами 70 А 485 NА бўлган автомашинага маъмурий баённома тузишга киришган. Қоидабузарликни тегишли тартибда расмийлаштириш жараёнида автотранспорт ҳайдовчиси ички ишлар органи ходимининг қонуний талабларига бўйсунмасдан, ҳужжатларни тақдим этмаган. Шунингдек, транспортда бирга бўлган О.О.нинг хотини Х.Ш. ва ўғли Т.С. билан биргаликда жанжал кўтариб, атрофдагиларнинг эътиборини жалб қилишган», — дейилади вазирлик ахборот хизмати раҳбари Шоҳруҳ Ғиёсовнинг расмий баёнотида.

Шоҳруҳ Ғиёсовнинг қайд этишича, аёл кишининг бақириқларига тўпланган фуқаролар ходимларнинг фаолиятига қаршилик кўрсатган. Жанжалдан фойдаланган ҳайдовчи эса автотранспортига миниб, воқеа жойидан яширинган.

Ҳозирда жанжал иштирокчиларининг барчаси аниқланиб, тергов олди суриштирув ишлари олиб борилмоқда. Ходимларнинг ҳаракатларига эса қонуний баҳо бериш учун хизмат текшируви тайинланган.

«Шу ўринда, қоидабузарлигини яшириш ва жавобгарликдан қутулиб қолиш учун ўзини жазавага солиб, провокациялар уюштириб, омманинг эътиборини жалб қилиш мақсадида жанжал кўтаришга ҳаракат қилаётган фуқароларимизга эслатиб ўтамиз – ҳуқуқбузарлик учун жавобгарлик муқаррар», — дейилади вазирлик муносабатида.