Ўзбекистоннинг шимолий ҳудудларига 8 июль куни Кавказдан антициклон таъсири остида салқин ҳаво оқимлари кириб келди. Натижада ҳаво ҳароратининг бироз пасайганлиги кузатилди, деб хабар бермоқда «Ўзгидромет».

Қайд этилишича, 9 июль куни бу жараён Республиканинг марказий ҳудудларига ҳам ўз таъсирини кўрсатади. Кўпчилик вилоятларда қуруқ ва кам булутли об-ҳаво кузатилади, фақат Устюртда куннинг иккинчи ярмида, Тошкент вилоятида кечга томон қисқа муддатли ёмғир ёғиши, момақалдироқ бўлиши эҳтимоли бор.

Ҳаво ҳарорати 35-40 даража, баъзи жойларда 42 даражагача, Сурхондарё вилоятида 44-46 даража, шимолда 28-33 даража иссиқни ташкил этади.

Мамлакатдан салқин ҳаво фронтлари ўтиши оқибатида баъзи жойларда шамолнинг тезлиги 15-20 метр/секундгача кучайиши мумкин. 9—10 июль кунлари чангли бўрон билан бирга 25-30 метр/секундгача кучайиши кутилмоқда.

Дам олиш кунларида нисбатан салқин ҳаво оқимлари Республиканинг барча ҳудудларини бутунлай қамраб олади, ҳаво ҳарорати кечалари 20-25 даража, кундуз кунлари 32-37 даража, жанубда баъзи жойларда 39 дарагача атрофида бўлади.

Республиканинг тоғолди ва тоғли ҳудудларида момақалдироқ билан қисқа муддатли ёмғир ёғиши эҳтимоли бор.