ИИВ ЙҲХББ Ўзбекистон бўйича мавжуд онлайн режимида ишловчи фоторадарлар ва интеллектуал режимида ишловчи камералар тўғрисида маълумот берди.

Маълум қилинишича, стационар радарлар Жиззахда — 15 та, Қашқадарёда — 1 та, Қорақалпоғистонда — 6 та, Навоийда ва Бухорода — 8 тадан, Тошкент вилоятида — 29 та, Сурхондарёда — 4 та, Фарғонада — 5 та, Самарқандда — 12 та ва Сирдарёда 11 та мавжуд.

Онлайн режимида ишловчи фоторадарлар ва интеллектуал режимида ишловчи камералари Хоразмда — 16 та, Бухорода — 32 та, Қашқадарёда — 6 та, Қорақалпоғистонда — 10 та, Навоийда — 12 та, Тошкент вилоятида — 37 та, Фарғонада — 21 та, Андижонда — 82 та, Наманганда — 38 та ва Самарқандда 6 та мавжуд.

Аввалроқ Тошкент шаҳрида онлайн режимда ишловчи фоторадарлар сони 28 тани ҳамда интеллектуал режимда ишловчи камералар сони эса 89 тани ташкил этаётгани тўғрисида хабар берилганди.

Эслатиб ўтамиз, 2021 йилнинг апрелида Ўзбекистонда қоидабузарликларни аниқлаш учун камераларни ўрнатиш тартиби ҳақида ҳукуматнинг тегишли қарори қабул қилинди.

Унга кўра, махсус автоматлаштирилган фото ва видео қайд этиш дастурий-техник воситалари ўрнатилиши мумкин бўлган жойларнинг дислокацияси ишлаб чиқилади ҳамда E-ijro auksion платформаси орқали онлайн аукционга қўйилади. Тизим ўрнатилиши мумкин бўлган жой дислокацияси, мазкур ҳудуддаги транспорт оқими ва охирги 2 йилда аниқланган қоидабузарликлар тўғрисидаги маълумотлар очиқ эълон қилинади.

Июнь ойидан бошлаб Ўзбекистондаги чорраҳа ва йўлларда радар ва камералар қўйиш жойлари аукцион орқали савдога қўйилиши бошланди. 1 июль куни E-auksion сайтида биринчи бор Тошкент шаҳрида радар ўрнатиладиган жойлар аукционга чиқарилди.