Комада ётган россиялик хонанда МакSимнинг аҳволи оғирлашиб қолиши сабаби маълум қилинди

Москвадаги клиникалардан бирида бўлган россиялик 38 яшар хонанда Марина коронавируснинг асоратлари билан курашмоқда. Бу ҳақда Cosmopolitan нашри хабар берди.

Маълум қилинишича, нафақат хонанданинг ўзи, балки унинг бутун жамоаси ҳам COVID-19 билан зарарланган. 4 кун давомида ўзини ўзи даволаган қўшиқчи кейинроқ шифохонага ётқизилган. Тест таҳлилларида унинг организмида коронавирус инфекцияси борлиги аниқланмаган. Бу хонанданинг касалликка хос илк симптомлар бошланиши билан катта миқдорда антибиотик ва вирусга қарши дори воситалари қабул қилгани билан боғлиқ бўлиши мумкин. Вирус шиллиқ қаватлардан ўтиб, организмга чуқурроқ синггани сабаб ҳам ПЗР-тестида аниқланмаган бўлиши мумкин.

Қайд қилинишича, Маринада икки томонлама полисегментал пневмониянинг оғир даражаси аниқланган. Икки ҳафтадан буён медикаментоз комада бўлган хонанда ўпкасида 80 фоиз зарарланиш аниқланган.

«Икки томонлама полисегментал пневмония ўпка тўқималарининг умумий зарарланганини билдиради. Ўткир нафас етишмовчилиги ва газ алмашинуви бузилганидан ташқари организмда кучли интоксикация ривожланмоқда. Бундан ташқари, касаллик қўзғатувчиси — пневмакокк юрак-қон томир тизимига салбий таъсир қилади», — деган шифокор-пулмонолог Сергей Пурясев.

Аввалроқ хонанда аҳволи ёмонлашганини оддий шамоллашга йўйгани, коронавирусга топширган тест таҳлили натижаси салбий чиққанидан кейин фаол ишлашда давом этгани ҳақида хабар берилганди. У тана ҳарорати юқори ва ҳолсиз бўлганда ҳам Казандаги концертни қолдирмасдан, чиқиш қилишда давом этган. Шифокорларга Москвага келганидагина мурожаат қилган. 15 июнь куни Instagram саҳифасига шифохонада томчи укол олаётган суратини жойлаган. Шундан кейин алоқага чиқмаган.

«Бу унинг энг асосий хатоси бўлган: касаллик нафас олиш тизимини даҳшатли даражада зўриқтиради. Ўпка тўқимаси олов пакетни эритгани сингари емирилади. Хонанда шу аҳволда саҳнада чиқишда давом этган. Кучли вентиляция ҳисобига қўшиқчининг соғлом тўқима қолдиқлари ҳам зарарланган ва хонанда мазкур концерт билан ўзини тамом қилган», — деб қўшимча қилади шифокор.

МакSим шифохонага ётқизилганининг эртаси куни унинг пиар-директори Маргарита Соколова клиникага етиб келган. У хонандани сунъий комага тушишдан аввал кўришга муваффақ бўлгани, унга энг яхши шифокорлар қараётганини маълум қилган. Шунингдек, у ҳаммадан тинчлик режимига амал қилиш ва аҳмоқона саволлар бермасликни илтимос қилган.

МакSимнинг клиплари режиссёри Вадим Шатров эса коронавирус билан кураша олмасдан, 45 ёшда ҳаётдан кўз юмган.

Маринанинг аҳволи қандай эканлиги ҳақида маълумот бериб турган Яна хонанданинг ҳисоб рақами солиқчилар томонидан блоклангани ҳақидаги хабарни инкор қилиб, турли миш-мишлар тарқатишдан аввал расмий манбаларга мурожаат қилиш кераклигини таъкидлаган.