Тожикистонда COVID-19 инфекцияси тарқалишининг олдини олиш бўйича эпидемияга қарши чораларни кучайтириш республика штаби мамлакатнинг 18 ёшдан ошган аҳолиси учун коронавирусга қарши мажбурий эмланиш жорий этилганини эълон қилди, деб ёзади «Ховар» агентлиги.

Фото: «Abdmch.tj»

«Штаб қарорига кўра, … коронавирусга қарши вакцинация 18 ёшдан ошган фуқаролар учун мажбурий ҳисобланади», — дейилади баёнотда.

Вакцинация бепул асосда амалга оширилади. Эмланмаган фуқаролар тиббий ёрдам сўраб оилавий шифокорга ёки маҳаллий тиббиёт муассасасига мурожаат қилиши керак.

Шунингдек, қўшимча қилинишича, бошқа мамлакатга сафар қилиб, сўнг Тожикистон ҳудудига кираётган фуқароларга ПЦР-тест бор-йўқлигидан қатъи назар COVID-19’га қарши диагностикадан ўтиш ва ўн кун давомида ўз-ўзини яккалаш режимида бўлиш тавсия этилган.

Бундан ташқари, коронавирус тарқалишининг юқори хавфи туфайли, ҳукумат аҳолига тўй ва тантаналарни энг кам сонли меҳмонлар билан ўтказишни тавсия қилмоқда.

18 ёшдан ошган фуқароларни COVID-19’га қарши эмлаш кампанияси Душанбеда 25 июнь куни бошланди. Айни вақтда мамлакатда Ҳиндистонда ишлаб чиқарилган AstraZeneca вакцинаси ҳамда Sinovac компаниясининг CoronaVac вакцинаси қўлланилмоқда.

Тожикистонда 2021 йилнинг 11 январидан буён коронавирусга чалиниш бўйича бирор-бир расмий ҳолат қайд этилмаган. 26 январь куни президент Эмомали Раҳмон мамлакат коронавирус устидан ғалаба қозонганини эълон қилган, шу билан бирга, аҳолини ниқоб режимига риоя қилиш ва масофа сақлашни унутмасликка чақирган.

Июнь ойи бошида ОАВда Тожикистонда коронавирус қайтадан авж олгани ҳақида хабарлар тарқалди. Соғлиқни сақлаш вазирлиги эса буни қатъиян рад этди ва хабарларни фақатгина миш-миш деб атади.

Кейинроқ Тожикистонда коронавирусга чалиниш ҳолатлари ҳақида расман маълум қилинди. Шу муносабат билан, мамлакатнинг ҳар бир фуқаросидан ушбу соҳадаги мутахассисларнинг тавсияларига қатъий амал қилиш, зарурат бўлмаган жойга бормаслик, жамоат жойларида ниқобдан ва бошқа дезинфекцияловчи воситалардан фойдаланиш талаб этилади.

Мавзуга доир: