«Толибон» ҳаракати жангарилари билан тўқнашувдан кейин чекинган 300 дан ортиқ Афғонистон ҳарбийларини Тожикистон чегарачилари ўз мамлакати ҳудудига киритди, деб ёзади «Ховар» агентлиги Тожикистон чегара хизматига таяниб.
«Афғонистон Қуролли Кучларининг 300 дан зиёд ҳарбий хизматчилари қуролли қаршиликка дош беролмасдан, ҳимоя чизиғи орқали давлат чегарасини кесиб ўтди», — дейилади хабарда.
Чегара хизмати қўшимча қилишича, Афғонистон ҳарбий хизматчилари инсонийлик ва аҳил қўшничилик тамойилларидан келиб чиқиб Тожикистон ҳудудига киритилган.
1 май куни АҚШ бошчилигидаги НАТО мамлакатлари ўз қўшинларини олиб чиқишни бошлаганидан кейин «Толибон» ҳаракати катта кўламда ҳужумни амалга ошириб, эндиликда сўнгги 20 йил ичидаги энг катта ҳудудни — мамлакатнинг қарийб 40 фоизини назорат қилмоқда. Икки ой ичида гуруҳ ушбу ҳудудни икки карра кенгайтирди, дея аниқлик киритди Американинг Long War Journal таҳлилчилари. «Толибон»нинг хатти-ҳаракатларига жавобан Афғонистон миллий сафарбарлик эълон қилиб, кўнгиллиларга қурол тарқатишни бошлади.
23 июнь куни 130 дан ортиқ афғон ҳарбийлари «Толибон» билан жанглардан кейин Тожикистон чегарасини босиб ўтди. Ўшанда чекинганлар орасида тўрт нафар ярадор бўлган, улардан бири кейинроқ вафот этган.
Эслатиб ўтамиз, АҚШ президенти Жо Байден маъмурияти Марказий Осиёнинг уч давлати — Ўзбекистон, Қозоғистон ва Тожикистондан Афғонистондаги НАТО қўшинлари чиқиб кетгунга қадар 9 мингга яқин Афғонистон фуқаросини вақтинча қабул қилишни сўради. Мазкур фуқаролар АҚШ ҳарбийлари билан ишлаган ва эндиликда «Толибон»нинг ўч олишидан қўрқмоқда.
Аввалроқ «Толибон» Афғонистоннинг Тожикистон билан чегарадаги ҳудудини эгаллаб олгани ҳамда тожик—афғон чегарасидаги вазият кескин деб баҳоланаётгани ҳақида хабар берилганди. Кейинроқ Афғонистонда ҳукумат қўшинлари «Толибон» жангариларини мамлакат шимолидаги бир нечта туманлардан сиқиб чиқаргани маълум бўлди. АҚШ давлат котиби Энтони Блинкен Афғонистондан АҚШ қўшинлари чиқариб кетилгач, мамлакатда ҳокимият тепасига «Толибон» жангарилари келиши мумкинлигини истисно қилмаганди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)