Тошкент шаҳрида COVID-19 касаллигини даволаш бўйича тажрибага эга бўлган хусусий клиникаларга коронавирус беморларини даволашга рухсат берилади. Бу ҳақда пойтахт ҳокимлиги матбуот хизмати хабар берди.
Фото: «Дарё» / Мадина Нурман
Мамлакатда, айниқса, Тошкент шаҳрида кунлик касалланиш ҳолатлари сони яна ортиб бормоқда. Соғлиқни сақлаш вазирлиги маълумотларига кўра, 1 июль куни Ўзбекистонда 495 кишида коронавирус аниқланди. Шундан 99 нафари Тошкент шаҳрида қайд этилган.
Касалланганлар сони ортгани туфайли Тошкентда спорт мажмуаларидаги ковид-марказлар қайтадан очила бошланди. 2 июль куни ДХХ тасарруфидаги «Ёшлик» спорт мажмуасида ковид-марказ қайтадан ташкил этилди.
Пойтахт ҳокими Жаҳонгир Ортиқхўжаев Тошкент шаҳар Соғлиқни сақлаш бошқармаси раҳбари ва бошқа масъулларга яна бир қанча ковид-марказларни шу кунларда очиш кераклигини маълум қилди. Унинг сўзларига кўра, 5 июль, душанба куни «Ўзэкспомарказ»да коронавирусга чалинган беморларни қабул қилиш маркази фаолияти ҳам қайта ташкил этилади.
Эслатиб ўтамиз, Ўзбекистонда хусусий клиникаларга COVID-19’га чалинган беморларни даволашга 2020 йилнинг июлида рухсат берилганди.
