Ўзбекистонда уч ой олдин (1 апрель куни) коронавирусга қарши вакцинация жараёнлари бошланган эди. ССВ шу уч ой давомида қанча одам тўлиқ эмлангани ҳақида маълумот берди.
Қайд этилишича, 30 июнь ҳолатига кўра, Ўзбекистонда 3 680 361 доза вакцина қўлланилган. Бу шунча киши эмланди, дегани эмас. Бу дозалар вакцинациянинг тўлиқ босқичларида қўлланилган миқдорни билдиради. Тўлиқ эмланиш учун ҳар бир киши 2 ёки 3 босқичда эмланиши керак.
Уч ой давомида 685 564 нафар фуқаро тўлиқ босқичда эмланди.
Давлат статистика қўмитаси маълумотларига кўра, 1 апрель ҳолатига Ўзбекистоннинг доимий аҳолиси сони 34 млн 695 минг 553 кишини ташкил этади.
«Gazeta.uz»нинг маълум қилинишича, ушбу маълумот асосида ҳисобланса коронавирусга қарши эмланганлар аҳолининг умумий сонидан 1,98 фоизни ташкил этади.
Бундан ташқари, биринчи босқичда эмланганлар аҳолининг 6,5 фоизини (2 миллион 256 мингдан ортиқ), иккинчи босқичда эмланганлар эса 3,61 фоизини (1 миллион 252 мингдан ортиқ) ташкил этади.
Маълумот учун, ҳозирга қадар Исроилда 55,41 фоиз, АҚШда 46,52 фоиз, Туркияда 17,73 фоиз, Буюк Британияда 48,17 фоиз, Россияда 11,87 фоиз, Қозоғистонда 10,53 аҳоли коронавирусга қарши тўлиқ эмланган.
Эслатиб ўтамиз, вакцинация жараёнлари ихтиёрийлик асосида олиб борилмоқда. Эмланиш истагини билдирган фуқаролар тегишли кўриклардан ўтказилгач, вакцинация жараёнларига жалб этилади.
Маълумот учун, Ўзбекистоннинг вакцина захираси 7,4 миллион дозага етган. Тошкентда 28 июндан 18 ёшдан катта бўлган барча қатлам коронавирус инфекциясига қарши давлат бюджети маблағлари ҳисобидан ихтиёрий тарзда оммавий эмланмоқда.
Изоҳ (0)