Абдулазиз Комилов Пентагон раҳбари билан мудофаа йўналишидаги соҳаларда икки томонлама ҳамкорликни муҳокама қилди

1 июль куни Вашингтон шаҳрига Ўзбекистон делегацияси раҳбари сифатида келган ташқи ишлар вазири Абдулазиз Комилов АҚШ мудофаа вазири Ллойд Остин билан учрашув ўтказди.

ТИВ матбуот хизматининг хабар беришича, учрашув чоғида Пентагон раҳбари вазир Абдулазиз Комиловни Ўзбекистон мустақиллигининг 30 йиллиги билан табриклади.

Музокараларда мудофаа йўналишидаги, минтақавий хавфсизликни таъминлаш, умумий таҳдид ва хавф-хатарларга қарши курашиш каби соҳалардаги икки томонлама ҳамкорликнинг долзарб жиҳатлари муҳокама қилинди. Турли даражалар ва йўналишлардаги мунтазам мулоқот сабабли сўнгги йилларда Ўзбекистон—Америка алоқалари ижобий ўсиш суратларини касб этаётгани, амалий мазмун билан бойиб бораётгани қайд этилди.

АҚШ мудофаа вазири Ллойд Остин Афғонистонда вазиятни барқарорлаштириш борасидаги халқаро саъй-ҳаракатларнинг Ўзбекистон томонидан кўп йиллардан буён қўллаб-қувватланаётганлигини олқишлади ҳамда ушбу мамлакат иқтисодиётини қайта тиклаш ва унинг Марказий Осиё минтақасига интеграциясига кўмаклашишга тайёрлигини билдирди.

Бундан аввал Абдулазиз Комилов АҚШ давлат котиби Энтони Блинкен билан учрашгани ҳақида хабар берилган эди.