Бухорода қиздирилган жисмлар билан 2 ёшли қизчани қийноққа солиб, унинг ўлимига сабабчи бўлган энагага суд ҳукми ўқилди

Бухорода қарамоғига ташлаб кетилган икки нафар болани калтаклаб, улардан бирининг умрига зомин бўлган энагага суд ҳукми ўқилди. Бу ҳақда «Zo‘r TV» телеканалининг «Бу кун» дастурида маълум қилинди.

Маълум қилинишича, бухоролик аёлнинг икки ва уч ёшли қизларини қарамоғига олган энага уларни аёвсиз калтаклаб келган, баданларига қиздирилган жисмларни босиб, қийноққа солган.

2020 йилнинг 23 декабридан 25 декабрига қадар аёл икки ёшли қизалоқни ошхона пичоғининг дастак қисми билан уриб, электр дазмол ва ошхона капгирини қиздириб, шунингдек, гугурт доналарини ёқиб, ушбу жисмларни қизчанинг танасига босган. Бундан ташқари, чекаётган сигареталарини ҳам унинг баданига босиш йўли билан жисмоний қийноққа солган. Шу билан бирга, энага ўзининг жиноий ҳаракатларини давом эттириб, қизалоқнинг танасининг турли соҳаларига қўллари билан уриб, унинг умрига зомин бўлган.

Кўз ўнгида синглисига қўлланилган қийноқлар ва унинг ўлими қизчанинг опасига ҳам салбий таъсир кўрсатган.

«Бошида алдадим, синглинг даволанишга Россияга кетди дедим. Бўлмади барибир, чунки кўз олдида ўлган болам. Алдай олмадим. Кечқурун уйғониб кетиб, ‘укам олдимга келиб ўтирди’ деб айтади… Буни яхши қилишнинг ўзи бўлмаяпти, баданидаги доғларни мен кеткиза олмайман», — дейди она.

Судда энага Жиноят кодексининг 110-моддаси 2-қисми «а,в» бандлари, 104-модда 3-қисми «д» банди билан айбли деб топилиб, 6 йил-у 4 ойга озодликдан маҳрум этилди.

Эслатиб ўтамиз, 2020 йилнинг октябрида Бухорода 7 ёшли қизалоқни қийноққа солиб, унинг қўли ва юзларини куйдирган эр-хотинга суд ҳукми ўқилган эди.