Сўнгги кунларда Ўзбекистонда июль ойининг боши учун меъёрий қийматлардан 4-6 даражага юқори бўлган аномал иссиқ об-ҳаво кузатилмоқда. Бу ҳодиса Эрон ҳудудларидан қуруқ ва иссиқ ҳаво оқимларининг кириб келиши билан боғлиқдир, деб ёзмоқда «Ўзгидромет».
2 июль, жума куни республикамизнинг кўпчилик вилоятларида қуруқ ва кам булутли об-ҳаво кузатилади, фақат Андижон, Наманган, Фарғона вилоятларида куннинг иккинчи ярмида, Тошкент вилоятида кечга томон қисқа муддатли ёмғир ёғиши, момақалдироқ бўлиши эҳтимоли бор. Баъзи жойларда шамолнинг тезлиги 15-20 метр/секундгача кучайиши мумкин.
Дам олиш кунларида эса иссиқ ва қуруқ об-ҳаво шароити сақланиб қолади, ҳаво ҳарорати кечалари 24-27 даража, кундуз кунлари 38-41 даража, шимолда, жанубда ва чўл ҳудудларда баъзи жойларда 44 даражагача иссиқ атрофида бўлади. Шамолнинг 15-20 метр/секунд тезликкача кучайиши сақланиб қолади.
Республиканинг айрим тоғли ҳудудларида куннинг иккинчи ярмида момақалдироқ билан қисқа муддатли ёмғир ёғиши эҳтимоли бор.
Эслатиб ўтамиз, «Ўзгидромет» ҳафта давомида яна иссиқ ва қуруқ об-ҳаво бўлишини маълум қилганди, келаси ҳафта эса 46 даражагача иссиқ бўлиши кутилмоқда.
Изоҳ (0)