Ўзбекистон ва Хитой мамлакатда вакцина ишлаб чиқаришни йўлга қўйиш лойиҳасини тезлаштиришни режалаштирмоқда, деб хабар беради Инновацион ривожланиш вазирлиги.
1 июль куни инновацион ривожланиш вазири Иброҳим Абдураҳмонов Хитойнинг Ўзбекистондаги элчиси Сзян Ян билан телефон орқали мулоқот қилган.
Суҳбат давомида томонлар Ўзбекистон ҳудудида коронавирусга қарши вакцина ишлаб чиқаришни йўлга қўйиш масаласини муҳокама қилган. Иброҳим Абдураҳмонов ушбу йўналишда Хитойнинг Anhui Zhifei Longcom компанияси билан музокаралар олиб борилаётганини ҳамда ушбу компания вакилларининг ишлаб чиқариш инфратузилмаси билан танишиш учун Ўзбекистонга ташриф буюриши кутилаётганини маълум қилган. Ўз ўрнида, Хитой элчихонасидан ушбу лойиҳани амалга оширишни жадаллаштириш бўйича фикр алмашилган.
«Шу билан бирга, инновацион ривожланиш вазири элчи хонимдан Навоий вилоятида доривор моддаларни синтез қилиш бўйича Ўзбекистон—Хитой тиббиёт технологиялари паркини яратиш лойиҳасини тезлаштириш бўйича амалий кўмак кўрсатишни сўради. Лойиҳа 10 миллион доллар миқдорида Хитой томонидан инвестиция киритилишини кўзда тутган бўлиб, ҳозирда ушбу молиявий маблағларнинг киритилишида ва қурилиш ишларини бошлашда кечикишлар юзага келмоқда», — дейилади хабарда.
Элчи Сзян Ян вазир томонидан берилган таклифларни ўрганиб чиқишини ва томонлар тез орада ушбу йўналишларда ижобий натижаларга эришишига ишонч билдирган.
Эслатиб ўтамиз, февраль ойида Ўзбекистон Хитойнинг Zhifei Longcom Biopharmaceutical компанияси томонидан яратилган ZF 2001 вакцинасининг ҳаммуаллифи сифатида тан олингани ҳақида хабар берилган эди. Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танлаган.
Изоҳ (0)